ოცნების პარლამენტის ვიცე-სპიკერის ნინო წილოსანის თქმით, "MEGOBARI აქტის" ფარგლებში სასანქციო სიაში მოხვედრა მისთვის დიდი პატივია.

“მაქვს პატივი, რომ პირველად მოვხვდი იმ ადამიანების სიაში, რომლებიც სანქცირდებიან თავისი სამშობლოსთვის თავდადებისთვის და სამშობლოსთვის ბრძოლისთვის. ამიტომ ნამდვილად, როგორც არაერთხელ გვითქვამს უკვე, ამ სიაში მოხვედრა პატივი არის, იმის ფონზე, რომ არანაირი დასაბუთება არ აქვს ამ სიაში მათი მხრიდან ადამიანების შეყვანას", — ამის შესახებ ნინო წილოსანმა "იმედი LIVE"-ში განაცხადა.

წილოსანმა ისიც თქვა, რომ "არ სჯერა, რომ ამერიკაში არ იციან მეგობრობა რას ნიშნავს".

"არც დასაბუთებაზე აღარ ვლაპარაკობთ, ელემენტარულად ისეთი ფაქტობრივი ცდომილებები აქვთ, როდესაც მოსამართლეების სიაში ჰყავთ შეყვანილი ადამიანი, არც მოსამართლეა და უკვე არანაირი კავშირი არ აქვს ამ ყველაფერთან. ასეთი ფაქტობრივი ცდომილებები ბევრია. თავად დასახელება არის დიდი ცდომილება. მე ეჭვი მეპარება და ნამდვილად არ მჯერა, რომ ამერიკაში არ იციან მეგობრობა რას ნიშნავს. ამიტომ ეს დასახელება „მეგობარი აქტი“ მხოლოდ და მხოლოდ პიარული შეფუთვა არის იმ მტრული და ქართველი ხალხის წინააღმდეგ მტრული განწყობისა, რომელიც ამ აქტში არის", — თქვა წილოსანმა.

რაც შეეხება რესპუბლიკელ კონგრესმენ ჯო უილსონს, რომლის დაინიცირებულიცაა კონგრესში "MEGOBARI აქტი", ის ქართველ პოლიტიკოს შალვა ნათელაშვილს შეადარა. მისი თქმით, უილსონი "ჩვენს შემთხვევაში შალვა ნათელაშვილის კატეგორიის პოლიტიკოსია".

"თავად ის ფაქტი, რომ ქართული ოპოზიცია და ეს რადიკალები ჯო ვილსონს ეყრდნობიან, უბრალოდ შეგრძნობების დონეზე, რომ ავუხსნა ეს არის ადამიანი, რომელიც პირობითად ჩვენს შემთხვევაში შალვა ნათელაშვილის კატეგორიის პოლიტიკოსია. ძალიან საინტერესო არის, რომ ჯო უილსონი 2001 წლიდან არის მე მგონი ამერიკის კონგრესის წევრი და იმ პირობებში, როდესაც მან მთელი ნაციონალური რეჟიმის სისასტიკე ისე გაიარა, რომ ერთი განცხადებაც და ერთი აქტიც არ დაუინიცირებია და ფაქტობრივად ემხრობოდა და ეთანხმებოდა იმ სადისტურ რეჟიმს, 2008 წლის ომი ისე გადაიარეს, რომ არანაირი აღშფოთება ისეთი ქმედითი ნაბიჯებით არ გამოუხატავთ და ფაქტობრივად ქართველი ხალხი დატოვეს ამ სადისტების და ომის პირობებში პირდაპირ მიგვანიშნებს, რომ ამ აქტს არ აქვს არანაირი ობიექტური საფუძველი", — თქვა წილოსანმა.