აშშ-ის რეგიონული უსაფრთხოების ოფისმა გააუქმა რეკომენდაცია, რომლის მიხედვითაც, საელჩოს თანამშრომლებმა თავი უნდა აარიდონ "ისთ ფოინთს", "გალერია თბილისს" და "თბილისი მოლს", — ამის შესახებ განცხადებას საქართველოში აშშ-ის საელჩო ავრცელებს.

მათი ცნობით, 7 მაისს გვიან ღამით, საქართველოს სამართალდამცავმა ორგანოებმა საელჩოს აცნობეს, რომ განგაშის შეტყობინებაში ნახსენები სამი სავაჭრო ცენტრიდან არცერთში ასაფეთქებელი მოწყობილობები არ აღმოჩნდა.

"7 მაისს აშშ-ის საელჩოს მიერ გაგზავნილი განგაშის შემდეგ, საქართველოს სამართალდამცავმა ორგანოებმა გუშინ ღამით აცნობეს საელჩოს, რომ განგაშის შეტყობინებაში ნახსენები სამი სავაჭრო ცენტრიდან არცერთში ასაფეთქებელი მოწყობილობები არ აღმოჩნდა. [აშშ-ის] რეგიონული უსაფრთხოების ოფისმა გააუქმა რეკომენდაცია, რომლის მიხედვითაც, საელჩოს თანამშრომლებმა თავი უნდა აარიდონ ამ ადგილებს", — ნათქვამია საელჩოს განცხადებაში.

7 მაისს საქართველოში აშშ-ს საელჩომ გაავრცელა ინფორმაცია იმის შესახებ, რომ თბილისში არსებულ 3 სავაჭრო ცენტრში— "ისთ ფოინთში", "გალერია თბილისსა" და თბილისის სავაჭრო ზონაში შესაძლო აფეთქებების შესახებ მიაწოდეს ინფორმაცია.

აშშ-ის რეგიონული უსაფრთხოების ოფისი თბილისში ყველა მის თანამშრომელს მოუწოდებდა მორიდებოდა ამ ლოკაციებს, სანამ ზუსტად არ იქნებოდა ცნობილი, რომ ამ მოლების სტუმრობა უსაფრთხოა.