საქართველოს პრემიერ-მინისტრის გიორგი კვირიკაშვილის მიმართვა, რომლითაც მან რუსეთის ხელისუფლებას რთული ვითარების დასაძლევად ერთობლივი ნაბიჯების გადადგმა მოუწოდა, ნინო ბურჯანაძემ და ირმა ინაშვილმა მოიწონეს.

როგორც დემოკრატიული მოძრაობის ლიდერი, ნინო ბურჯანაძე რუსთავი 2-სთვის მიცემულ ინტერვიუში ამბობს, კვირიკაშვილის მიმართვა სწორი ნაბიჯია, თუმცა დაგვიანებული.

"ვფიქრობ, ვიდრე ასე დაიძაბებოდა სიტუაცია, ვიდრე იქნებოდა თიბილოვის განცხადება ერთი თვის ვადის თაობაზე, ვიდრე დაპირისპირება მოხდებოდა, მანამდე უნდა გადაედგა ხელისუფლებას ეს ნაბიჯები. საერთოდ, ხელისუფლებას რომ სწორი ნაბიჯები გადაედგა არჩილ ტატუნაშვილიც ცოცხალი იქნებოდა, საზღვარიც არ იქნებოდა ასე ღრმად გადმოწეული საქართველოს შუაგულში და ძალიან ბევრი პრობლემა მოგვარების გზაზე იქნებოდა."

პრემიერს ეთანხმება პატრიოტთა ალიანსიც. პარტიის ლიდერი ირმა ინაშვილი On.ge-სთან ამბობს, რომ დიალოგი რუსეთთან დაგვიანებულია:

"ჩვენი ამოცანაა გადმოვასვენოთ მიცვალებული და დავიტიროთ ჩვენი ქართველი ვაჟკაცი, რომელსაც ამდენი დღეა ოჯახი ელოდება. მნიშვნელოვანია საუბარი, როგორც ოსებთან ისე რუსულ მხარესთანაც."

ნინო ბურჯანაძისა და ირმა ინაშვილის პარტიები რუსეთთან პირადპირი დიალოგის მომხრე არიან. თავად ბურჯანაძე და ინაშვილის პარტიის წევრები არაერთხელ ყოფილან რუსეთში რუს კოლეგებთან შეხვედრებზე.

გიორგი კვირიკაშვილის განცხადებას არ ეთანხმებიან ევროპული საქართველო, ნაციონალური მოძრაობა, რესპუბლიკელური პარტია, თავისუფალი დემოკრატები, ლეიბორისტული პარტია.