ასობით ბრიტანელი ჯარისკაცი პოლონეთსა და ესტონეთში გაემგზავრება, რათა ევროპის აღმოსავლეთ საზღვრები რუსეთის პოტენციური საფრთხისგან დაიცვან. ინფორმაციას BBC ავრცელებს.

დიდი ბრიტანეთის თავდაცვის მინისტრის, მაიკლ ფელონის თქმით, 500 ჯარისკაცისგან შემდგარი ძლიერი ბატალიონი გაიგზავნება ესტონეთში, 150 სამხედრო მოსამსახურე კი - პოლონეთში.

რუსეთის მიერ ყირიმის ნახევარკუნძულის ანექსიის შემდეგ, ნატოს ვალდებულებაა, აღმოსავლეთ ფლანგზე 4 ახალი ბატალიონი შექმნას.

მაიკლ ფელონის განცხადებით, მიზანი "რუსეთის შემდგომი აგრესიის შეჩერებაა":

"ნატოს აღმოსავლეთ ქვეყნები გრძნობენ უზარმაზარ ზეწოლას რუსეთის მხრიდან, რომელიც საზღვარზე ვარჯიშობს, მათ საჰაერო სივრცეში იჭრება და ა.შ.

ეს [ჯარების განთავსება] არის ის, რასაც ნატო დიდი ხანია გეგმავს, ის, რაც ესტონეთის, ლიტვისა და ლატვიის მსგავს ქვეყნებს სურთ".

სამხედრო დანაყოფები, რომლებსაც გაერთიანებული სამეფო, აშშ, გერმანია და კანადა გაუძღვებიან, ადგილზე 2017 წლის დასაწყისში იქნებიან.

გაერთიანებული სამეფოს შეიარაღებული ძალები მსოფლიოს 80-ზე მეტ ქვეყანაში მსახურობენ. მათ შორის 450 ჯარისკაცი ავღანეთში და 275-ზე მეტი - ერაყში.

კანადა რუსეთის საზღვართან განთავსებულ NATO-ს ბატალიონს 1000 ჯარისკაცს შემატებს