კანადა ლატვიაში, ერთ-ერთ ბატალიონში, 1000 ჯარისკაცს გაგზავნის. NATO ბატალიონს რუსეთის მიერ ყირიმის ანექსიის საპასუხოდ აღმოსავლეთ ევროპაში აგროვებს. ინფორმაციას კანადური მედია ავრცელებს.

კანადის თავდაცვის მინისტრის, ჰარჯიტ საჯანის, განცხადებით, აშშ-თან, ბრიტანეთთან და გერმანიასთან ერთად, კანადა გაუძღვება მაღალი მზაობის ბრიგადას, რომელიც აღმოსავლეთ და ცენტრალურ ევროპაში ნატოს ძალას გაზრდის.

მისივე თქმით, დეტალები მომავალ თვეში, პოლონეთში ნატოს სამიტზე გახდება ცნობილი:

„როგორც პასუხისმგებლიანი პარტნიორი მსოფლიოში, კანადა მოკავშირეების გვერდით დგას, რომლებიც აგრესიის შეჩერებას, მშვიდობისა და სტაბილურობის უზრუნველყოფას ემსახურებიან“.

განცხადება მას შემდეგ გაკეთდა, რაც აშშ-ის პრეზიდენტმა, ბარაკ ობამამ, კანადის პარლამენტში სიტყვით გამოსვლის დროს, კანადას ნატოს მხარდასაჭერად მეტი აქტიურობისკენ მოუწოდა.

NATO თავისი წევრების აღმოსავლეთ ფლანგზე სამხედრო ძალის გაზრდას იწყებს. ცივი ომის შემდეგ უპრეცედენტო შემთხვევაა, როდესაც ალიანსი თავისი წევრების აღმოსავლეთ ფლანგზე სამხედრო ძალის გაზრდას იწყებს.

კანადელი ჯარისკაცები 4000-იან ბრიგადას შეუერთდებიან, რომელსაც ნატო ბალტიისპირეთსა და პოლონეთში განათავსებს კრემლის საფრთხის შესაჩერებლად.

ჯარების განთავსება მომავალი წლისთვის იგეგმება და ამ ფაქტის დადასტურება, მომავალ თვეს, ვარშავის სამიტზეა მოსალოდნელი.

ნატოს სახმელეთო ძალების მეთაურმა, ამერიკელმა გენერალმა ბენ ჰოჯესმა, ალიანსის სისუსტის საკითხი წინა კვირას წამოაყენა. მისი თქმით ნატო ვერ შეძლებს ბალტიის ქვეყნების დაცვას რუსეთის შეჭრის შემთხვევაში.