საქართველოს ახალგაზრდა იურისტთა ასოციაცია და საქართველოს დემოკრატიული ინიციატივა იუსტიციის უმაღლეს საბჭოს მოუწოდებს შეწყვიტოს სუბიექტური შეხედულებებით სასამართლოებში თავმჯდომარეების დანიშვნა. ორგანიზაციების განმარტებით, დაუშვებელია თავმჯდომარეები თანამდებობაზე ინიშნებოდნენ წინასწარ დადგენილი კრიტერიუმებისა და პროცედურის არარსებობის პირობებში. ამ შინაარსით ერთობლივი განცხადება ორგანიზაციებმა დღეს, 26 თებერვალს გაავრცელეს.

"დაუშვებელია თბილისის სააპელაციო სასამართლოს სისხლის სამართლის საქმეთა პალატის თავმჯდომარედ დაინიშნოს სასამართლო სისტემაში არსებული გავლენიანი ჯგუფის წევრი. აღნიშნული კიდევ უფრო გააძლიერებს კლანურ მმართველობას სასამართლო სისტემაში, მნიშვნელოვნად გაზრდის ინდივიდუალურ მოსამართლეზე კონტროლის რისკებს და დამღუპველია სასამართლოს დამოუკიდებლობისთვის", - აღნიშნულია არასამათავრობო ორგანიზაციების განცხადებებში.

მათ მიაჩნიათ, რომ თბილისის სააპელაციო სასამართლოს თავმჯდომარედ, მიხეილ ჩინჩალაძე კლანური მმართველობის ერთ-ერთი წარმომადგენელია დანიშნული. ამ გარემოების გამო, საია-სა და GDI-ში ფიქრობენ, რომ სააპელაციო სასამართლოს სისხლის სამართლის საქმეთა კოლეგიის თავმჯდომარედ ისეთი მოსამართლე უნდა დაინიშნოს, რომელიც ვერ მოექცევა შიდა გავლენის ქვეშ.

"სასამართლო სისტემაში არსებული გავლენიანი ჯგუფი უმეტესად სწორედ სასამართლოების თავმჯდომარეებისაგან შედგება. გავლენიანი ჯგუფის წევრები არიან იუსტიციის უმაღლესი საბჭოს წევრი მოსამართლეებიც, რომლებიც ან სასამართლოს თავმჯდომარეობის ნიშნით აირჩევიან ამ თანამდებობაზე, ან საბჭო ნიშნავს მათ თავმჯდომარეებად მას შემდეგ რაც ისინი საბჭოს წევრები გახდებიან", - ვკითხულობთ განცხადებაში.

მათ მიაჩნიათ, რომ სასამართლოს თავმჯდომარეების არასათანადო გაძლიერებას და თავმჯდომარის თანამდებობით მანიპულირებას ხელი შეუწყო სასამართლო რეფორმის მესამე ტალღის ფარგლებში მიღებულმა ცვლილებებმა.

"სწორედ მესამე ტალღის რეფორმის შედეგად იქნა გაუქმებული შეზღუდვა, რომელიც სასამართლოების თავმჯდომარეებს უკრძალავდა იუსტიციის უმაღლესი საბჭოს წევრობას", - აღნიშნავენ ორგანიზაციები.