ევროკავშირის სადამკვირვებლო მისიია არჩილ ტატუნაშვილის გარდაცვალებათან დაკავშირებით აცხადებს, რომ ისინი მზად არიან მხარი დაუჭირონ მიმდინარე გამოძიებას. ასევე, ერგნეთის ინციდენტების პრევენციისა და მათზე რეაგირების მექანიზმის მეშვეობით ხელი შეუწყოს განხილვებს.

ევროკავშირის სადამკვირვებლო მისია მიიჩნევს, რომ განსაკუთრებით მნიშვნელოვანია თანამშრომლობის ჩამოყალიბება, რათა ყველა საჭირო დოკუმენტაცია გაიცვალოს გარდაცვლილის სიკვდილის მიზეზის გასარკვევად. მისია მოელის, რომ ტატუნაშვილის სიკვდილის მიზეზის დასადგენად სრული, საფუძვლიანი და გამჭვირვალე გამოძიება შედგება.

ევროკავშირის სადამკვირვებლო მისია აცხადებს, რომ ისინი აგრძელებენ მოვლენების შემდგომ განვითარებაზე დაკვირვებას და სამძიმარს უცხადებს გარდაცვლილის ოჯახს.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე გაათავისუფლეს.