ევროპული საქართველოს წევრმა, სერგი კაპანაძემ საქართველოს პარლამენტს მოუწოდა შეიქმნას ე.წ ოთხოზორიას სია. კაპანაძის თქმით, ცხინვალის რეგიონის ციხეში გარდაცვლილი არჩილ ტატუნაშვილი, ოთხოზორიას მკვლელობის გაგრძელებაა :

"შევქმნათ ე.წ ოთხოზორიას სია, მსგავსად მაგნიტსკის სიისა, რომელიც შევლენ ის ადამიანები, რომლებიც პასუხისმგებელი არიან ამ სისასტიკეებზე. ამ ადამიანების მიმართ გავრცელდეს სანქციები ჩვენი პარტნიორების მხრიდან. ასევე, ამ ადამიანებმა არ ისარგებლონ საქართველოს სახელმწიფოს მიერ, ოკუპირებულ ტერიტორიაზე მაცხოვრებლების მიმართ სხვადასხვა შეღავათებით, მაგალითად, სამედიცინო შეღავათებით".

22 თებერვალს ცხინვალის რეგიონში, ციხეში საქართველოს მოქალაქე გარდაიცვალა. ოსური მხარის განცხადებით, არჩილ ტატუნაშვილმა ცხინვალში, იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

საქართველოს სახელწიფო უსაფრთხოების სამსახურის ინფორმაციით, 2018 წლის 22 თებერვალს ოკუპირებული ცხინვალის წარმომადგენლებმა, საქართველოს მოქალაქეები: არჩილ ტატუნაშვილი, ლევან ქუტაშვილი და იოსებ პავლიაშვილი დააკავეს.