შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა, ქეთევან ციხელაშვილმა განაცხადა, რომ ცხინვალის რაიონის ციხეში საქართველოს მოქალაქის გარდაცვალებაზე პასუხისმგებლობა საოკუპაციო რეჟიმს აკისრია.

მინისტრის თქმით, არჩილ ტატუნაშვილი 23 თებერვალს, ახალგორში ძალის გამოყენებით დააკავეს:

"სრულიად გაურკვეველ ვითარებაში მოხდა მისი სიცოცხლის ხელყოფა. უკვე გააქტიურებული არის ცხელი ხაზი, ინფორმირებულია ევროკავშირის სადამკვირებლო მისია და ჟენევის თანათავმჯდომარეები, რათა დაუყოვნებლივ მოხდეს მისი გარდაცვალების ზუსტი გარემოებების დადგენა და მიეცეს ადეკვატური შეფასება ამ უმძიმეს ფაქტს, რაზეც პასუხისმგებლობა ეკისრება საოკუპაციო რეჟიმს".

საქართველოს სახელწიფო უსაფრთხოების სამსახურის ინფორმაციით, 2018 წლის 22 თებერვალს, ოკუპირებული ცხინვალის წარმომადგენლებმა, საქართველოს მოქალაქეები: არჩილ ტატუნაშვილი, ლევან ქუტაშვილი და იოსებ პავლიაშვილი დააკავეს.

ოსური მხარის განცხადებით, არჩილ ტატუნაშვილმა ცხინვალში, იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

საქართველოს სახელმწიფო უსაფრთხოების სამსახური ცხელი ხაზის მეშვეობით, დეფაქტო ხელისუფლების და რუსეთის საოკუპაციო ძალების მხრიდან არჩილ ტატუნაშვილის გარდაცვალების შესახებ ზუსტი და ამომწურავი ინფორმაციის მიღებას მოითხოვს.