საქართველოს პრემიერ-მინისტრმა, გიორგი კვირიკაშვილმა განაცხადა, რომ საქართველოს მართლმადიდებელი ეკლესიისა და საქართველოს კათალიკოს-პატრიარქის, ილია მეორეს დამსახურებაა ქვეყანაში ტოლერანტობის ისტორიული ტრადიციის შენარჩუნება და განმტკიცება. ამის შესახებ პრემიერმა დღეს, 12 თებერვალს საქართველოს სამოციქულო მართლმადიდებელი ეკლესიის შეჩერებული ავტოკეფალური მმართველობის აღდგენის 100 წლისთავისთვის ღონისძიებაზე განაცხადა.

მისი თქმით, ეკლესიისა და პატრიარქის დამსახურებით, საზოგადოებაში სხვადასხვა რელიგიის მიმართ პატივისცემაა და სხვადასხვა აღმსარებლობის წარმომადგენელთა მშვიდობიანად თანაცხოვრებაა შესაძლებელი.

"საზოგადოებასა და ეკლესიას შორის ნდობასა და პატივისცემაზე დაფუძნებული ურთიერთობის ტრადიცია და კულტურა ჩვენი ისტორიის ერთ-ერთი მთავარი მონაპოვარი და უძლიერესი საყრდენი გახლავთ და ამაზეა დაშენებული საქართველოს სახელმწიფოებრიობა", - განაცხადა პრემიერმა.