საქართველოდან გაუჩინარებული აზერბაიჯანელი ჟურნალისტი აფგან მუხტარლი აზერბაიჯანის ციხეში ვადაზე ადრე დააბრუნეს. მისი ცოლი, ლეილა მუსტაფაევა აღნიშნულ ფაქტს მუხტარლის განცხადებას უკავშირებს, რომელშიც მან გატაცებაში ბრალი საქართველოს პრემიერ-მინისტრ გიორგი კვირიკაშვილს დასდო. ინფორმაციას და თარგმანს TV პირველიავრცელებს.

"ვფიქრობ, გადაწყვეტილება იმის შესახებ, რომ აფგანი დროზე ადრე დაებრუნებინათ ციხეში იმის შემდეგ მიიღეს, რაც მან ქართულ და აზერბაიჯანულ მედიებთან გატაცების დეტალები გაიხსენა. ამ ინტერვიუებში მან ჩამოთვალა ის პირები, რომლებიც დაინტერესებული იყვნენ მის გატაცებაში. ეს პირები [ბიძინა] ივანიშვილი, [ილჰამ] ალიევი და მოქმედი პრემიერი კვირიკაშვილი არიან. ორი ქვეყნის ინტერესებში არ იყო, რომ თავისუფლებაზე ყოფილიყო, ამიტომ დროზე ადრე დააბრუნეს ციხეში. ინტერვიუების უმეტესობა აფგანმა ქართულ მედიას მისცა, სწორედ ამიტომ, მაქვს საფუძვლიანი ეჭვი, რომ ქართულმა მხარემ მოთხოვა აზერბაიჯანს ჩემი მეუღლე ციხეში დაებრუნებინათ."

ციხიდან დროებით გათავისუფლების შემდეგ აფგან მუხტარლიმ ჟურნალისტებს ინტერვიუ მისცა, სადაც განაცხადა, რომ თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა.

აღნიშნულთან დაკავშრებით განცხადებები გაავრცელეს მთავრობის წარმომადგენლებმა. პარლამენტის თავმჯდომარემ, ირაკლი კობახიძემ განაცხადა, რომ მუხტარლის განცხადებები ეჭვებს ბადებს, ამიტომ ისინი ელდებიან გამოძების დასრულებას. მისი თქმით, პარლამენტი ამ მიმართულებით ზედამხედველობას ახორციელებს.

საქართველოს საგარეო საქმეთა მინისტრის, მიხეილ ჯანელიძის თქმით, მუხტარლის ბრალდებები სრული აბსურდი და მიუღებელია, რომ უცხო ქვეყნის მოქალაქე პოლიტიკურ განცხადებებს აკეთებს.

ფაქტი შეაფასა ლტოლვილთა და განსახლების მინისტრმა, სოზარ სუბარმაც, მისი განცხადებით, მუხტარლის გატაცების ვერსია ბუნდოვანია, რაც ცხადყოფს რომ ბრალდებები უსაფუძვლოა. სუბარის თქმით, ჟურნალისტს ტყუილი არ ეკადრება.