საქართველოს ლტოლვილთა და განსახლების მინისტრის, სოზარ სუბარის თქმით, აზერბაიჯანელი ჟურნალისტს, აფგან მუხტარლის ტყუილი არ ეკადრება. ასე გამოეხმაურა მინისტრი საქართველოდან გაუჩინარებული ჟურნალისტის განცხადებას საქართველოს პრემიერისთვის მისი გატაცების პასუხისმგებლობის დაკისრებაზე.

"ეს ადამიანი ციხეშია, კარგად მესმის მისი. მას შეიძლება ბევრი რამე აწუხებდეს, მაგრამ ტყუილების თქმა და მოგონება არ ეკადრება არავის და მით უფრო ადამიანს, რომელიც არის ჟურნალისტი და რომელსაც ჟურნალისტურ გამოძიებებზე აქვს პრეტენზია. ეს არის ძალიან არასერიოზული განცხადებები", - განაცხადა სოზარ სუბარმა.

მინისტრი მიიჩნევს, რომ მუხტარლის მიერ მოყოლილი გატაცების დეტალები აბსურდულია, რაც ცხადყოფს, რომ მისი ბრალდებები უსაფუძვლოა:

"რაც შეეხება იმას, თუ როგორ მოხდა საზღვარზე, ამასთან დაკავშირებით არის ძალიან ბევრი კითხვა და იმედი მაქვს გამოძიება დაადგენს. მე ვიტყვი იმას, რასაც პირველივე დღეებში ვამბობდი, დღისით-მზისით თბილისის ცენტრში რომ ადამიანის გატაცება მოხდეს შეუძლებელია იქ არ იყოს რამდენიმე ათეული მოწმე, რომელიც იმავე წუთში დარეკავს პოლიციაში, იმავე წუთში გადაიღებს ამას ვიდეოზე და ჩვენ მოწმე ვართ, რომ მსგავსი რამეები ასე არ ხდება".

მუხტარლის განცხადებით, მის გატაცებაში მონაწილე პირები ქართველები იყვნენ და ამაზე პასუხისმგებლობა გიორგი კვირიკაშვილს აკისრია, ვინაიდან პრემიერის თანხმობის გარეშე საზღვარზე ვერავინ გადაიყვანდა. მისივე თქმით, აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა.

მუხტარლი დავის გაგრძელებას ადამიანის უფლებათა ევროპულ სასამართლოში აპირებს. მისი თქმით, კვირიკაშვილმა პასუხი უნდა აგოს დანაშაულზე.

აფგან მუხტარლი თბილისიდან 29 მაისს გაუჩინარდა და მეორე დღეს ბაქოს ციხეში აღმოჩნდა. ნოემბერში აზერბაიჯანის სასამართლომ შინაპატიმრობაზე უარი უთხრა და მას ექვსწლიანი პატიმრობა მიუსაჯა