აფგან მუხტარლი თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა. ინტერვიუ მუხტარლისთან რუსთავი 2-მა ჩაწერა და თარგმანიც მას ეკუთვნის.

"საქართველოში ყოფნის პერიოდში ალიევის ბიზნესს ვსწავლობდი. საქართველოში მას აქვს დიდი ბიზნესი ტურისტულ სფეროში, ფლობს სასტუმროებს და მიწის ნაკვეთებს. მას ეკუთვნის ავიაკომპანია სილქ ვეი და ორგანიზაცია სილქ ვეი საქართველო. საქართველოში მისი პარტნიორი ბიძინა ივანიშვილია. სწორედ ამ ბიზნეს პარტნიორობის მსხვერპლი გავხდი, ჩემს მიერ დაწყებული გამოძიების გამო."

მუხტარლის თქმით, მის გატაცებაში მონაწილე პირები ქართველები იყვნენ და ამაზე პასუხისმგებლობა გიორგი კვირიკაშვილს აკისრია, ვინაიდან პრემიერის თანხმობის გარეშე საზღვარზე ვერავინ გადაიყვანდა:

"საქართველოში სასამართლო პროცესები გამჭვირვალედ მიმდინარეობს, ამიტომ ქართულმა მხარემ გადაწყვიტა, რომ კანონიერი გზებით კი არ გადამცეს აზერბაიჯანს, არამედ ჩემი უკანონო გატაცება მოახდინა. პრემიერ მინისტრის თანხმობის გარეშე საზღვარზე ვერავინ გადამიყვანდა.

პირებს, რომლებიც ჩემს გატაცებაში მონაწილეობდნენ კრიმინალური პოლიციის ფორმა ეცვათ, ისინი ამ უწყების წარმომადგენლები იყვნენ. ყველა მათგანი ქართველი იყო და არცერთი აზერბაიჯანელი. ჩემს გატაცებაზე პასუხისმგებლობა აზერბაიჯანულ და ქართულ მხარებს ეკისრებათ. კერძოდ, კი გიორგი კვირიკაშვილს, საქართველოს სასაზღვრო პოლიციის, კრიმინალური პოლიციისა და საბაჟო გამშვები პუნქტის ხელმძღვანელებს."

მუხტარლი დავის გაგრძელებას ადამიანის უფლებათა ევროპულ სასამართლოში აპირებს. მისი თქმით, კვირიკაშვილმა პასუხი უნდა აგოს დანაშაულზე.

დაკავებული აზერბაიჯანელი ჟურნალისტი აფგან მუხტარლი 8 თებერვალს დროებით გამოუშვეს, რათა ზაქათალაში თავისი დაღუპული ნათესავების 40-ში მიიღოს მონაწილეობა.

აფგან მუხტარლი თბილისიდან 29 მაისს გაუჩინარდა და მეორე დღეს ბაქოს ციხეში აღმოჩნდა. ნოემბერში აზერბაიჯანის სასამართლომ შინაპატიმრობაზე უარი უთხრა.