ვიდეომ, რომელშიც რუსი კადეტები საცვლებისა და კადეტები ქუდების ამარა ცეკვავენ, რუსეთში დიდი დისკუსია გამოიწვია. რამდენიმე სტუდენტი სასწავლებლიდან კინაღამ გარიცხეს კიდეც.

ულიანოვსკის სამოქალაქო ავიაციის ინსტიტუტის კადეტების მიერ გადაღებული იმიტირებული სტრიპტიზის ვიდეო ინტერნეტში რამდენიმე დღის წინ გავირუსდა. AP-ის ცნობით, რუსი პოლიტიკოსების ნაწილმა სტუდენტების გარიცხვა მოითხოვა. საჰაერო ტრანსპორტირების ფედერალურმა სააგენტომ კი ვიდეოს "ამორალური ინციდენტი" და "სამოქალაქო ავიაციის სპეციალისტთა შეურაცხყოფა" უწოდა.

რუსული საზოგადოების გამოხმაურება სტუდენტების უწყინარ ვიდეოზე კიდევ ერთხელ უსვამს ხაზს ქვეყანაში არსებულ ჰომოფობიურ განწყობებს.

2013 წელს რუსეთში მიიღეს კანონი, რომელიც "პროპაგანდისა და არატრადიციული სექსუალური ურთიერთობების" არასრულწლოვნებში გავრცელებას კრძალავს. კანონი ლგბტ საკითხებზე დისკუსიას შეუძლებელს ხდის, თუმცა ხელისუფლება ბავშვებზე ზრუნვით იმართლებს თავს.

სოლიდარობის მიზნით, რუსეთის რამდენიმე ქალაქში სტუდენტებმა საკუთარი ვიდეოები გადაიღეს. ერთ-ერთზე აგრარული უნივერსიტეტის, იმავე მუსიკაზე მოცეკვავე სტუდენტები არიან ასახული.

რამდენიმე დღის წინ, ულიანოვსკის გუბერნატორმა სერგეი მოროზოვმა გამოძიების ჩატარება მოითხოვა, რათა დადგინდეს, დაარღვიეს თუ არა მომავალმა პილოტებმა უნივერსიტეტის წესდება. ამასთან მოროზოვი სტუდენტების გარიცხვის წინააღმდეგია:

"კოლეჯიდან გაგდება ამ კადეტებს ვერც განათლების მიღებაში დაეხმარება და ვერც პატრიოტულ გრძნობებსაც გაუღვივებს."

საზოგადოებრივ დისკუსიას რეგიონის პროკურორიც გამოეხმაურა და თქვა, რომ ვიდეოს არც ერთი კანონი ანდა სასკოლო წესი არ დაურღვევია.

ლეგენდარული რუსი პილოტის, მაგომედ ტოლბოიევის აზრით, "ტრაგედიაა, როდესაც ბავშვები ასე ცეკვავენ." მან კოლეჯის რექტორს გადადგომისკენ მოუწოდა.

პოლიტიკოს ივან მოხანჩუკის განცხადებით, ვიდეო რუსეთის საერთაშორისო იმიჯისთვის საზიანოა:

"ამის ჩვენებას აპირებენ ჩვენი მტრებისთვის?"