სიდნი სვინი კვლავ ყურადღების ცენტრშია — მსახიობმა ახალი სარეკლამო რგოლი გამოაქვეყნა, სადაც ჩანს როგორ ადის ღამით ჰოლივუდის ნიშანზე და მის ასოებზე ერთმანეთზე გადაბმულ ბიუსტჰალტერებს კიდებს (ეს აქტი ქალის საცვლების ბრენდის ახალი რეკლამის ნაწილი იყო). ჰოლივუდის სავაჭრო პალატა აცხადებს, რომ სიდნი სვინის ჰოლივუდის ნიშანზე ლიფების ჩამოკიდებაზე ნებართვა არ ჰქონია.

სიდნი სვინის ახალი სარეკლამო რგოლი

ფოტო: კადრები ვიდეოდან

სვინიმ ორშაბათს ღამით ინსტაგრამზე გააზიარა ვიდეო, სადაც ჩანს, როგორ ავსებს ის და მისი მცირე გუნდი მინივენს საცვლებით და შემდეგ ჰოლივუდის ბორცვებისკენ მიემართებიან. ადგილზე მისვლის შემდეგ, ვიდეოში ჩანს, როგორ აბამს სვინი ლიფებს ერთმანეთზე და ჰოლივუდის ნიშნის ასოებზე კიდებს.

LA Times-ის ინფორმაციით, ჰოლივუდის სავაჭრო პალატამ, ორგანიზაციამ, რომელიც ჰოლივუდის ნიშნის ინტელექტუალურ უფლებებს ფლობს, განაცხადა, რომ ეს ღამის ოპერაცია არ იყო ავტორიზებული. ასევე ითქვა, რომ Hollywood Sign Trust-ს, რომელიც ნიშნის მართვაზეა პასუხისმგებელი, ამ ქცევის შესახებ ინფორმაცია საერთოდ არ ჰქონდა.

"ნებისმიერმა პირმა ან ჯგუფმა, რომელიც ჰოლივუდის ნიშნის კომერციული მიზნებით გამოყენებას ან მასზე წვდომას გეგმავს, ამისთვის ჰოლივუდის სავაჭრო პალატისგან ლიცენზია ან ნებართვა უნდა მიიღოს", — განუცხადა LA Times-ს ჰოლივუდის სავაჭრო პალატის ხელმძღვანელმა სტივ ნისენმა — "სიდნი სვინის მონაწილეობით განხორციელებული აქტი, არ იყო ავტორიზებული ჰოლივუდის სავაჭრო პალატის მიერ და წინასწარ არც ვიცოდით ამის შესახებ".

ლოს-ანჯელესის პოლიციის დეპარტამენტის ინფორმაციით, სვინის მიერ ტერიტორიაზე უნებართვო გადაადგილებაზე (trespassing) პოლიციაში ოფიციალური საჩივარი ამ დროისთვის არ არის შეტანილი.

კადრი სიდნი სვინის ახალი სარეკლამო რგოლიდან

ეს არ არის პირველი შემთხვევა, როცა სვინი სარეკლამო კამპანიის გამო კრიტიკის ცენტრში აღმოჩნდა. 2025 წლის ნოემბერში, სერიალ ეიფორიის ვარსკვლავი American Eagle-ის ჯინსების კამპანიის სახე გახდა, სლოგანით — "სიდნი სვინის კარგი ჯინსები აქვს", რაც სიტყვათამაშია ფრაზაზე (კარგი გენები). კამპანიამ სოციალურ ქსელებში დიდი აჟიოტაჟი გამოიწვია, კრიტიკოსების თქმით, ბრენდი მსახიობის თეთრ წარმოშობას იდეალიზებდა.

მაშინ სვინიმ ჟურნალ GQ-ს განუცხადა, რომ არ მიიჩნია საჭიროდ რეკლამაში საკუთარი მონაწილეობა აეხსნა, რადგან, მისი თქმით, "ყოველთვის მჯეროდა, რომ ჩემი საქმე არ არის ადამიანებს ვუკარნახო, რა იფიქრონ".