ფინეთის სამხედრო დაზვერვის 2026 წლის მიმოხილვაში რუსეთის გლობალურ გავლენაზეა საუბარი. დოკუმენტში ვკითხულობთ, რომ რუსეთის მთავარი მიზანი გლობალური გავლენის გაზრდაა და ის დასავლურ ლიბერალურ დემოკრატიას საფრთხედ აღიქვამს.

მიმოხილვაში ასევე ნათქვამია, რომ რუსეთის გავლენა სამხრეთ კავკასიაში შემცირებულია, სომხეთისა და აზერბაიჯანის ურთიერთობა რუსეთთან შესუსტდა, "საქართველო პოლიტიკურად რუსეთთან დაახლოვდა".

"რუსეთის მთავარი მიზანი — გლობალური გავლენის გაზრდა — უცვლელი რჩება. მისი რეჟიმი დასავლურ ლიბერალურ დემოკრატიას საფრთხედ აღიქვამს და ცდილობს, დასავლეთის დასუსტებას უკრაინაში ომის, სხვა კონფლიქტებისა და მტრული ჰიბრიდული ზემოქმედების გამოყენებით.

რუსეთის ყურადღება კონცენტრირებულია ყოფილი საბჭოთა კავშირის სივრცეზე, განსაკუთრებით კი უკრაინაში მიმდინარე ომზე, რომლის წინ წაწევასაც ის სხვა სტრატეგიული მიზნების ხარჯზე ახორციელებს.

რუსეთი კვლავ მნიშვნელოვან აქტორად რჩება სამხრეთ კავკასიაში, თუმცა მისი გავლენა შემცირებულია. მან დაკარგა სომხეთსა და აზერბაიჯანს შორის კონფლიქტის გარე მარეგულირებლის პოზიცია და ორივე ქვეყნის ურთიერთობა რუსეთთან შესუსტდა. ამავდროულად, საქართველო პოლიტიკურად რუსეთთან უფრო დაახლოვდა," — ვკითხულობთ მიმოხილვაში.