ყოველ ახალ წელს ბევრი ადამიანი მომდევნო წლის გეგმებს აქტიურად ადგენს: მაგალითად, ფიქრობს, რომ მეტ დროს გაატარებს ოჯახთან, დაიწყებს ჯანსაღად კვებას, დალევს ორ ლიტრ წყალს, მნიშვნელოვანი შენაძენისთვის დააგროვებს თანხა, მიიღებს რაციონალურ გადაწყვეტილებებს, იმოგზაურებს და ა.შ.

მაგრამ, რა მოხდება მაშინ, თუ ზემოთ ჩამოთვლილი გეგმების შედგენის ნაცვლად, უპირატესობას მივანიჭებთ განტვირთვას?

რატომ გვჭირდება სამსახურისგან დასვენება?

ჩვენი ფიზიკური და მენტალური ჯანმრთელობისათვის დასვენება სასიცოცხლოდ მნიშვნელოვანია. მარტივად რომ ვთქვათ, თუ ჩვენს თავებს არ მივცემთ მოდუნების საშუალებას — გადავიწვებით.

ფოტო: Freepik

გადაწვის შემთხვევაში, შესაძლოა, არა მხოლოდ სამუშაო საათების დროს შეხვედრებზე დასწრება გეზარებოდეთ, არამედ საყვარელ ადამიანებს თქვენი დაღლილობისგან გამოწვეული საუბრით გული ატკინოთ.

რა არის გადაწვა?

მსოფლიო ჯანდაცვის ორგანიზაციის ცნობით, გადაწვა არის "ხანგრძლივი, მოუგვარებელი სამუშაო სტრესი", რომლის ძირითადი სიმპტომებია:

  1. გადაღლა;
  2. ნაკლები ეფექტიანობა სამუშაო პროცესში;
  3. სამსახურის მიმართ ნეგატიური დამოკიდებულება.

გაითვალისწინეთ, რომ სტრესი და გადაწვა ორი სხვადასხვა მდგომარეობაა, ვინაიდან სტრესი დროებითია. მაგალითად, შესაძლებელია, საბოლოო პროექტის დედლაინამდე რამდენიმე დღე სტრესში იყოთ, თუმცა გადაწვა გრძელვადიანი პროცესია. იმ შემთხვევაშიც, თუ თქვენმა საბოლოო პროექტმა კარგად ჩაიარა, თქვენ მაინც გადაღლილები ხართ.

რომლებია გადაწვის ნიშნები?

გადაწვისგან თავის არიდება უფრო მარტივია, ვიდრე სხეულის დაღლილობისგან აღდგენა. ამიტომ, ყურადღება მიაქციეთ ქვემოთ ჩამოთვლილ სიმპტომებს, რათა თავიდან აირიდოთ გადაწვა და მისგან გამოწვეული პრობლემები. მისი ნიშნებია:

  1. თავის ტკივილი;
  2. ინსომნია (უძილობა);
  3. ზურგის ტკივილი;
  4. გაღიზიანება;
  5. არაჯანსაღად კვება;
  6. სამუშაოს არასათანადო შესრულება.

როგორ ავირიდოთ თავიდან გადაწვა?

პირველ რიგში, საკუთარ თავებს მოდუნების საშუალება მიეცით, რათა სტრესი აირიდოთ. ეს უკანასკნელი იწვევს კუნთის დაჭიმვას, რაც, მოგვიანებით, თავის ტკივილსა და ზურგის ტკივილში გადაიზრდება.

ფოტო: Freepik

გადაწვისგან თავის არიდების კიდევ ერთი მნიშვნელოვანი კომპონენტი ძილის რეჟიმის ჩამოყალიბებაა. ეცადეთ, ძილის წინ სამსახურის საქმეებზე, პოტენციურ დაგვიანებულ დედლაინებზე არ იფიქროთ და ტელეფონი დაძინებამდე მინიმუმ 1 საათით ადრე გათიშოთ. ექსპერტები ასევე გვირჩევენ, რომ ტელეფონის მაღვიძარას ნაცვლად, ტრადიციულ მაღვიძარებზე შევაჩეროთ არჩევანი.

მარტივი გზები — როგორ დავამატოთ დასვენება ჩვენს განრიგში

ეცადეთ, ყოველდღიურად საკუთარი თავისთვის დრო გამონახოთ, მაგალითად, დღის 10 წუთი დაუთმოთ სეირნობას, ხოლო 30 წუთი წიგნის კითხვას. შეგიძლიათ, კვირის ერთი დღე დასვენებას დაუთმოთ და სამსახურებრივი პასუხისმგებლობები დროებით დაივიწყოთ.

დაიმახსოვრეთ, ჯანმრთელობასთან დაკავშირებით რჩევების გათვალისწინება შეიძლება ლაბირინთს დაემსგავსოს, თუმცა თქვენი სხეულის სიგნალებზე მეტი ყურადღების მიქცევა სასიცოხლოდ მნიშვნელოვანია — დაისვენეთ, რათა არ გადაიწვათ.