რუსული მართლმადიდებელი ეკლესიის მსახურებას ჩამოშორებულ მღვდელ გლებ გროზოვსკის პედოფილიაში ბრალდებისთვის 14-წლიანი პატიმრობა მიუსაჯეს, წერს BBC. ბრალდებული დანაშაულს არ აღიარებს და განაჩენის გასაჩივრებას აპირებს.

სასამართლოს გადაწყვეტილებით, გროზოვსკი სამი არასრულწლოვანი გოგოს მიმართ სექსუალური ხასიათის ქმედებაშია დამნაშავე. გამოძიების ინფორმაციით, სამივე შემთხვევა მართლმადიდებლურ ბანაკებში 2009 და 2013 წლებში მოხდა.

პატიმრობასთან ერთად თითოეულ დაზარალებული ოჯახისთვის კომპენსაციის სახით 400 ათასი რუბლის (18 ათასი ლარი) გადახდა დაევალა.

სასამართლო პროცესი დახურულ რეჟიმში შვიდი თვის განმავლობაში გრძელდებოდა.

2013 წელს, სისხლის სამართლის აღძვრის დაწყების შემდეგ, გროზოვსკიმ მღვდელმსახურობისგან გათავისუფლება მოითხოვა და ისრაელში გაემგზავრა, სადაც ალკოჰოლსა და ნარკოტიკებზე დამოკიდებულთა დახმარების ცენტრში დასაქმდა. გამოძიების პერიოდში ის მღვდელმსახურებას ჩამოაშორეს.

გროზოვსკიმ მოქალაქეობის მოთხვნით ისრაელის შინაგან საქმეთა სამინისტროს მიმართა, მაგრამ უარი მიიღო. ის 2014 წელს დააკავეს და რუსეთში ექსტრადიცია ორი წლის შემდეგ მოხერხდა.