სპეცპროკურორი რობერტ მიულერი, რომელიც რუსეთის მხრიდან აშშ-ს საპრეზიდენტო არჩევნებში შესაძლო ჩარევის საქმეს იძიებს, აშშ-ს პრეზიდენტ დონალდ ტრამპის დაკითხვას გეგმავს. ინფორმაციას Washington Post ავრცელებს. გამოცემის თქმით, ცნობა ამის შესახებ მათ გამოძიების პროცესში საფუძვლიანად გარკვეულმა პირმა მიაწოდა.

წყაროს ცნობით, მიულერმა პრეზიდენტთან პირადად შეხვედრის სურვილი, დეკემბერში ტრამპის პირად იურისტებთან გამართულ შეხვედრაზე გამოთქვა. ამავე წყაროს ინფორმაციით, გამოძიება სწრაფი ტემპებით მიმდინარეობს და თავად პრეზიდენტიც მზადაა, მივიდეს დაკითხვაზე და ყველა შესაძლო კითხვას გასცეს პასუხი. თეთრი სახლის ადმინისტრაცია საკითხთან დაკავშირებით არანაირ კომენტარს არ აკეთებს. არსებული ინფორმაციით, მიულერის გუნდის წევრები უახლოეს დღეებში შეხვდებიან ტრამპის პირად იურისტებს, ჯონ დაუდს და ჯემ სეკულოუს, რათა განიხილონ და შეათანხმონ პრეზიდენტის დაკითხვის დეტალები.

დეკემბერში თეთრი სახლის იურიდიული სამსახურის უფროსმა განაცხადა, რომ სპეცპროკურორის გუნდმა უკვე დაასრულა პრეზიდენტის ადმინისტრაციის თანამშრომლების დაკითხვა. ამ წუთისთვის არსებული ინფორმაციით, გამოძიება განსაკუთრებულ ყურადღებას ამახვილებს დონალდ ტრამპ უმცროსსა და რუს იურისტ ნატალია ვესელნიცკაიას შორის 2016 წლის ზაფხულში გამართულ შეხვედრაზე. ამერიკული მედიის ცნობით, აღნიშნულ შეხვედრაზე უმცროსი ტრამპი ჰილარი კლინტონის მაკომპრემეტირებელი მასალების მიღებას ცდილობდა.

წინა თვეებში, აღნიშნული საქმის ფარგლებში, ბრალი წარედგინა დონალდ ტრამპის მრჩეველს მაიკლ ფლინს და მისი წინასაარჩევნო შტაბის ხელმძღვანელს პოლ მანაფორტს. ფლინს ცრუ ჩვენებებისთვის, ხოლო მანაფორტს გადასახადებისთვის თავის არიდების ბრალდება წაუყენეს.

დონალდ ტრამპი საქმეზე ყველა ბრალდებას კატეგორიულად უარყოფს. შაბათს ჟურნალისტებთან გამართულ შეხვედრაზე ტრამპმა განაცხადა, რომ წინაასაარჩევნო პერიოდში მისი შტაბს დანაშაული არ ჩაუდენია: "რუსეთთან არანაირი წინასწარი შეთანხმება არ ყოფილა. ჩემი ინფორმაციით, გამოძიება პირადად ჩემს წინააღმდეგ არ მიმდინარეობს, შეიძლება, ჰილარის წინააღმდეგ ასეთი გამოძიება მიმდინარეობს, მე არ ვიცი, მაგრამ ჩემ წინააღმდეგ არანაირი გამოძიება არ მიმდინარეობს".