განახლება: ისტორია, რომლის საფუძველზეც უსახლკაროს $400 ათასი შეუგროვეს, გამოგონილი აღმოჩნდა

ნოემბერში უსახლკარო ჯონიზე გიყვებოდით, რომელიც უცნობ ქალს უკანასკნელი $20-ით დაეხმარა და სანაცვლოდ მას GoFundMe-ზე ასობით ათასი დოლარი შეუგროვეს.

ბოლო ინფორმაციით, ჯონისთვის 14 347-მა უცნობმა 402 706 აშშ დოლარი მოიძია და რა თქმა უნდა, ყველას აინტერესებს, როგორ გამოიყენებს ის ამ თანხას.

ჯონი, კეიტ მაკლური, კეიტის შეყვარებული და მათი ძაღლი საშობაო მისალოც ბარათზე.

ფოტო: Kate McClure

კეიტ მაკლური ის უცნობი ქალია, რომელსაც ჯონი რამდენიმე თვის წინ უანგაროდ დაეხმარა და სწორედ მან წამოიწყო ჯონის დასახმარებელი კამპანია. ოდესღაც უსახლკარო ჯონი ახლა გასათენებელ ჭერს აღარ ეძებს და უცნობი ქალი მისი საუკეთესო მეგობარი გახდა.

როგორც კეიტი საიტზე წერს, ჯონი პირველ რიგში ახალი სახლის ყიდვას აპირებს, შემდეგ კი საოცნებო მანქანას, 1999 წლის ფორდ რეინჯერს შეიძენს.

ჯონიმ უკვე დაიქირავა ადვოკატი და ფინანსური მრჩეველი, რომლებიც მას ფულის სწორად განაწილებაში დაეხმარებიან. ის ყოველთვიურად მიიღებს მისთვის შეგროვებული თანხიდან ნაწილს, თუმცა ის სამსახურის პოვნასაც აპირებს.

კეიტის სიტყვებით, ოდესღაც უსახლკარო ჯონი იმ ადამიანებსაც დაეხმარება, რომლებიც მას მძიმე წლებში მარტო არ ტოვებდნენ. მან რამდენიმე ორგანიზაციასაც შესწირა გარკვეული თანხა. კეიტის თქმით, დანარჩენი თანხის განაწილება ჯონის პირადი საქმეა და მას მეტის გასაჯაროება არ სურს.

უსახლკაროს ამბავი, რომელიც უცნობ ქალს უკანასკნელი $20-ით დაეხმარა

როცა ოქტომბრის გვიან ღამეს კეიტ მაკლურის ნიუ-ჯერსის გზაზე მანქანა გაუჩერდა, მას უახლოეს ბენზინგასამართ სადგურამდე ფეხით წასვლა მოუწია. თუმცა იქვე მყოფმა უცნობმა უსახლკარო კაცმა მას მანქანაში დაბრუნება ურჩია და შესთავაზა, რომ საწვავს თავად მოუტანდა.

მაკლურის თქმით, უსახლკარომ, სახელად ჯონიმ, მას თავისი უკანასკნელი 20 დოლარით საწვავი უყიდა და მოუტანა, მას კი უკან მისაცემად ნაღდი ფული არ ჰქოდა. მან გადაწყვიტა, რომ ჯონის ძველი ცხოვრების დაბრუნებაში დახმარებოდა.

ფოტო: GoFundMe

მეორე დღეს მაკლური და მისი შეყვარებული უსახლკაროსთან მივიდნენ, ფული დაუბრუნეს და ესაუბრნენ. ამის შემდეგ, ისინი უცნობის სანახავად ხშირად მიდიოდნენ, ბოლოს კი გადაწყვიტეს, რომ მის შესახებ GoFundMe-ზე დაეწერათ:

"მინდა, რომ რამე კარგი გავაკეთო ამ უანგარო კაცისთვის, რომელიც მე ასე დამეხმარა. მასთან საუბარი მარწმუნებს, რომ ის ასეთ ცხოვრებას არ იმსახურებს".

თავდაპირველად უსახლკაროსთვის გამიზნული იყო 10 000 დოლარის შეგროვება, თუმცა საბოლოოდ, 14 347-მა უცნობმა ადამიანმა მისთვის 16 დღეში $402 706 შეაგროვა.

მაკლურის თქმით, უსახლკარო, რომლის ცხოვრებაც რამდენიმე დღეში შეიცვალა, ყოველ ღამით მშვიდ ძილს იმსახურებს და მას მუშაობის დაწყება ძალიან უნდა.

სანამ უსახლკარო გახდებოდა, ჯონი, მეხანძრედ და ექიმების დამხმარედ მუშაობდა.