სამეფო კარის თამაშები ბოლო დროის ყველაზე მაღალრეიტინგული და განხილვადი სერიალების საწყის პოზიციებს ინარჩუნებს. ყოველ სეზონთან და ახალ სერიასთან ერთად, მისი ფანდომის რიცხვი უფრო და უფრო იზრდება.

HBO-ს პოპულარული სერიალის მეექვსე სეზონმა თავისივე რეკორდი მოხსნა. Nielsen-ის ინფორმაციით, სეზონის მეათე, ბოლო, სერიის გასვლისას, HBO-ს 8.9 მილიონი მაყურებელი ჰყავდა. აქამდე სერიალის რეკორდული მაჩვენებელი 8.1 მილიონი იყო, რომელიც მეხუთე სეზონის ფინალური სერიების გასვლისას დაფიქსირდა.

HBO-ს ინფორმაციით, ამ სეზონში სამეფო კარის თამაშების მაყურებელთა საერთო რიცხვმა 32 მილიონს მიაღწია. "წინა წელთან შედარებით ეს რეიტინგის 15%-იანი ზრდაა" - იტყობინება USA Today.

მეექვსე სეზონის გადაღებისას, პირველად დაფიქსირდა შემთხვევა, როცა სერიალი წიგნის სიუჟეტს არ მიჰყვებოდა, რადგან ჯორჯ მარტინს წიგნის ახალი ტომი ჯერ არ დაუბეჭდავს.

მეექვსე სეზონმა საკმაოდ დიდი გამოხმაურება მიიღო კრიტიკოსთაგან. HBO-ს არ დაუზუსტებია, თუმცა სერიალის შემქმნელები ავრცელებენ ინფორმაციას მომდევნო ორი სეზონის შესახებ, რომელიც ჯამში 13 სერიისგან შედგება.