საქართველოს პრემიერ-მინისტრმა, გიორგი კვირიკაშვილმა ჟურნალისტებს ახალი წელი მიულოცა. როგორც პრემიერის ფეისბუკგვერდზე გამოქვეყნებულ ფოტოებზე ჩანს, მთავრობის ადმინისტრაციაში მთავრობის ბოლო სხდომის დასრულების შემდეგ ჟურნალისტებს ალკოჰოლითა და ტკბილეულით გაუმასპინძლდნენ. ჟურნალისტებმა პრემიერთან სელფიც გადაიღეს.

ფოტო: მთავრობის ადმინისტრაცია

"ყველანი ძალიან მიყვარხართ და ძალიან დიდ მადლობას გიხდით. ღმერთმა ქნას, 2018-ში ძალიან ბევრი სასიხარულო ამბავი გვქონდეს ერთად სათქმელი ჩვენი მოსახლეობისთვის", - წერია პრემიერის ფეისბუკგვერდზე და თან ჟურნალისტებთან ერთად გადაღებული ფოტოებია დართული.

მთავრობის ადმინისტრაციაში On.ge-ს განუცხადეს, რომ დღეს, 27 დეკემბერს, მთავრობის ბოლო სხდომა იყო და წინა წლების მსგავსად პრემიერმა ჟურნალისტებს ახალი წელი მიულოცა.

"წელსაც ჟურნალისტებს ჰქონდათ მოლოდინი, რომ პრემიერი ჩავიდოდა და მიულოცავდა იმიტომ, რომ ახსოვდათ - შარშან ბოლო სხდომის შემდეგ ჩავიდა და მიულოცა", - განუცხადეს On.ge-ს მთავრობის ადმინისტრაციის პრესსამსახურში. უწყებაში ხარჯებთან დაკავშირებით საჯარო ინფორმაციის სახით წერილით მიწერა მოითხოვეს.

გასულ წელს ჟურნალისტებს მთავრობის კანცელარიაში სხდომათა დარბაზთან მინისტრების ჩაწერა აეკრძალათ. მათთვის მთავრობამ მედიაცენტრი მოაწყო, თუმცა იქ მინისტრები მხოლოდ თავიანთი სურვილის შემთხვევაში ჩადიან და ჟურნალისტებს ნებისმიერ მინისტრთან არ ეძლევათ კითხვების დასმის საშუალება.