გიორგი მარგველაშვილმა, სამხედრო მოსამსახურეების ჯარში გაწვევის შესახებ, თინა ხიდაშელის გადაწყვეტილებაზე განაცხადა, რომ ამ ტიპის საკითხები ინტენსიური კონსულტაციების ფორმატში უნდა იქნას მიღებული:

"მე არ ვაფასებ გადაწყვეტილების სისწორეს, მე ვსაუბრობ ფორმაზე რომ ასეთი ტიპის გადაწყვეტილება უნდა იქნას მიღებული ინტენსიური კონსულტაციების შედეგად. მე მინდა დავეთანხმო ბატონ პრემიერ მინისტრს რომ ასეთი გადაწყვეტილებები რამდენად სწორი ან არასწორიც არ უდნა იყოს, არ უნდა იქნეს მიღებული ერთი თანამდებობის პირის მიერ, არამედ უნდა იქნას განხილული, როგორც მთავრობის სხდომაზე, ასევე უშიშროების საბჭოში".

პრეზიდენტის თქმით, ამ გადაწყვეტილების შესახებ, იგი დღემდე საქმის კურსში არ ყოფილა.

დღეს თავდაცვის მინისტრმა, თინა ხიდაშელმა ბრძანებას მოაწერა ხელი, რომლის თანახმადაც თავდაცვის სამინისტრო სამხედრო მოსამსახურეებს ჯარში აღარ გაიწვევს. ცვლილება სამხედრო მოსამსახურეთა მხოლოდ იმ 25%-ს შეეხება, რომელსაც აქამდე ზემოაღნიშნული უწყება იწვევდა ჯარში. რაც შეეხება დანარჩენ 75%-ს, რომელსაც შსს და სასჯელაღსრულების დეპარტამენტი იწვევს ჯარში, მათ აღნიშნული ცვლილება არ ეხებათ.