ანონიმური წერილი: ჟანგბადის ნინძები ქალაქში სუფთა ჰაერს ვითხოვთ

"სოციალურ აქტს თავის თავზე იღებენ ჟანგბადის ნინძები", - ამ სახის ანონიმური წერილი მიიღო On.ge-მ დღეს, 29 ნოემბერს. სოციალური კამპანიის ავტორები ქალაქში სუფთა ჰაერს მოითხოვენ და აცხადებენ, რომ მათი ამგვარი აქტივობა მხოლოდ დასაწყისია.

29 ნოემბერის დილით თბილისში ძეგლების ნაწილი მოქალაქეებს პირბადით დახვდათ. კამპანიის მიზანი ამ დრომდე უცნობი იყო, თუმცა მოქალაქეების უმეტესობის აზრით, აქცია-პერფომანსი თბილისში ჰაერის დაბინძურების პრობლემას უკავშირდება.

შინაგან საქმეთა სამინისტრომ ძეგლებისთვის პირბადეების გაკეთების ფაქტის შესწავლა დაიწყო. თბილისის ვიცე-მერმა ირაკლი ხმალაძემ კი განაცხადა, რომ მერია ამას არ მიესალმება და აღნიშნულ ფაქტს ძეგლების შეურაცხყოფას უწოდებს. ხმალაძის თქმით, ეს არის საზოგადოების შეურაცხყოფა, ვინაიდან პატივსაცემი ძეგლები არის აღჭურვილი პირბადეებით.