ალბათ გეცოდინებათ ის ამბავი, რომ "თვითნასწავლი რაკეტების მეცნიერი" მაიკ ჰიუსი საკუთარი ხელით დამზადებული რაკეტით უნდა გაფრენილიყო კოსმოსში და გადაეღო ფოტო, რითიც დაამტკიცებდა, რომ დედამიწა სფერული კი არა, სინამდვილეში ბრტყელია! მაგრამ ამ მეცნიერს, უფრო სწორად, ფსევდომეცნიერს პრობლემა შეექმნა: მთავრობამ თავისი გეგმის განხორციელების ნება არ მისცა.

ჰიუსს, რომელმაც განაცხადა, რომ არ სჯერა მეცნიერების, მთავრობამ აიძულა, თავისი ექსპერიმენტი გადაედო, რადგან მას არ აქვს უფლება, ჯართისგან დამზადებული რაკეტა საჯარო სივრციდან გაუშვას. ახლა კი, ეს კაცი შემდეგ კვირას გეგმავს, რომ თავისი ჯართი კერძო მიწიდან გაუშვას - იუწყება The Washington Post.

"ეს [გეგმა] კვლავ ძალაშია. უბრალოდ 3 მილის მოშორებით გადავდივართ. ასეთი რაღაცები ხდება, როცა რაიმე სახის მოლაპარაკება გაქვს მთავრობასთან", - განაცხადა The Washington Post-თან ფსევდომეცნიერმა.