საქართველოს პრემიერ-მინისტრი, გიორგი კვირიკაშვილი ბათუმში ჩავიდა და ამ მომენტში სასტუმრო ლეოგრანდის მიმდებარედ იმყოფება. კვირიკაშვილი ბათუმში ბრიუსელიდან ჩავიდა, სადაც აღმოსავლეთ პარტნიორობის სამიტს ესწრებოდა.

შინაგან საქმეთა სამინისტროს ინფორმაციით, დაახლოებით ორი საათის წინ, ბათუმში გაემგზავრნენ ვიცე-პრემიერი, შს მინისტრი გიორგი გახარია და ჯანდაცვის მინისტრის მოადგილე ზაზა სოფრომაძე.

შსს-ს ცნობით, ლეოგრანდში ხანძრის შედეგად 11 ადამიანი დაიღუპა. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის არიან როგორც სტუმრები, ასევე სასტუმროს თანამშრომლები. ისინი სხვადასხვა სირთულის ინტოქსიკაციის გამო, სასტუმროში მყოფი ადამიანები გადაყვანილი არიან ბათუმის კლინიკებში.

ადგილზე მობილიზებულია აჭარის საგანგებო სიტუაციების მართვის სამმართველოს 13 სახანძრო-სამაშველო მანქანა და 100-ზე მეტი მეხანძრე-მაშველი. ხანძართან დაკავშირებით მიმდინარეობს გამოძიება.