განახლება: ნიუსის თავდაპირველ სათაურში არ ეწერა სიტყვა "სავარაუდოდ". ის თურქული მედიასაშუალება, რომელსაც დაეყრდნო Daily Sabah, მხოლოდ ვარაუდის დონეზე წერს, რომ მოკლულთაგან ერთი ჩატაევია.

თურქული პრო-სახელისუფლებო მედიასაშუალება Daily Sabah ინფორმაციას ავრცელებს, რომლის მიხედვითაც, თბილისში, 21-22 ნოემბრის სპეცოპერაციის შედეგად მოკლულია ტერორისტული ორგანიზაცია ისლამური სახელმწიფოს მებრძოლი აჰმედ ჩატაევი. Daily Sabah ეყრდნობა სხვა თურქულ გამოცემა Haberturk-ს. Haberturk ვარაუდობს, რომ მოკლულებს შორის აჰმედ ჩატაევია, თუმცა არ ასახელებს, საიდან აქვს აღნიშნული ინფორმაცია.

აჰმედ ჩატაევი თურქეთის ხელისუფლების მიერ მიჩნეულია სტამბოლის ათათურქის აეროპორტში 2016 წელს განხორციელებული ტერაქტის ავტორად. აღნიშნულ ფაქტს მაშინ 45 ადამიანი ემსხვერპლა.

როგორც Daily Sabah წერს, ჩატაევმა და მისმა თანამებრძოლებმა საქართველოს საზღავრი არალეგალურად გადაკვეთეს და მათ სამართალდამცავებს დანებებაზე უარი უთხრეს.

აჰმედ ჩატაევი საქართველოში 2012 წელს, ლაფანყურის სპეცოპერაციისას დააკავეს. ის იყო მომლაპარაკეებლი საქართველოს ხელისუფლებასა და მებრძოლებს შორის, რომლებიც მოგვიანებით, პოლიციასთან შეტაკებისას მოკლეს ლაფანყურის ტყეში.

ჩატაევს ბრალი ასაფეთქებელი მოწყობილობების მართლსაწინააღმდეგო შეძენა, შენახვა, ტარებისთვის წაუყენეს, თუმცა, ხელისუფლების ცვლილების შემდეგ, 2012 წლის დეკემბერში, ჩატაევი წინასწარი პატიმრობიდან პროკურატურის მოთხოვნით გირაოთი გაათავისუფლეს. 2013 წლის იანვარში კი ჩატაევის მიმართ სისხლის სამართლებრივი დევნა საერთოდ შეწყდა მტკიცებულებების არარსებობის გამო და გირაოს თანხაც უკან დაუბრუნდა. მან საქართველო დატოვა. ბოლო წლებში ის სირიაში იმყოფებოდა და ტერორისტული ორგანიზაცია ისლამური სახელმწიფოს მხარეს იბრძოდა.

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.

ქართული სამართალდამცავი უწყებები აცხადებენ, რომ მიმდინარეობს სპეცოპერაციისას ლიკვიდირებულთა იდენტიფიცირება.