თბილისში, ისანში, ბერი გაბრიელ სალოსის გამზირზე, თითქმის 20 საათის განმავლობაში მიმდინარე სპეცოპერაცია უკვე დასრულებულია.

რა ვიცით სახელმწიფო უსაფრთხოების სამსახურისგან

• სპეცოპერაციის შედეგად, გარდაიცვალა ერთი სპეცრაზმელი და დაჭრილია სახელმწიფო უსაფრთხოების სამსახურის ორი თანამშრომელი;
• დაჭრილია შსს-ს განსაკუთრებულ დავალებათა დეპარტამენტის ორი თანამშრომელი;
• დაკავებულია დანაშაულებრივი ჯგუფის ერთი პირი, ხოლო სამი ლიკვიდირებულია;
• წინასწარი ინფორმაციით, დანაშაულებრივი ჯგუფის წევრები არ იყვნენ საქართველოს მოქალაქეები;
• დანაშაულებრივი ჯგუფის წევრებს კონტრტერორისტული დეპარტამენტი ბოლო რამდენიმე კვირა აკვირდებოდა;
• ჯგუფის წევრების სრული იდენტიფიკაციის მიზნით, მიმდინარეობს შესაბამისი ღონისძიებები დანაშაულებრივი კავშირების დადგენის მიზნით;
• სპეცოპერაციის დაწყების დროს, პირებმა, რომელთა დაკავების ოპერაციაც მიმდინარეობდა სპეცრაზმელებს ცეცხლი გაუხსნეს;
• ბინების ზარალი ანაზღაურდება.

სხვა წყაროების ინფორმაცია

• სპეცოპერაციის დროს მშვიდობიანი მოქალაქეები არ დაშავებულან;
• სპეცოპერაციის გამო, უსაფრთხოების მიზნით, სამგორის რაიონში მდებარე სამ საბავშვო ბაღში და მიმდებარე საჯარო სკოლაში სასწავლო პროცესი შეჩერებული იყო;
• ბინა, რომელთანაც სპეცოპერაცია ტარდებოდა, პანკისელ მერი ხანგოშვილზეა რეგისტრირებული. რეგინფოს ცნობით, ბინის ფაქტობრივი მფლობელი ასევე პანკიელი თინა გაურგაშვილია, რომელიც რამდენიმე წელია ავსტრიაში ცხოვრობს, ბინის გასაღები კი მის შვილს, ასლანბეგ ჯაბრაილოვს ჰქონდა.
• ნეტგაზეთის ინფორმაციით, ბინა ჯაბრაილოვის ცოლის ძმამ რიზვან გორნაკაშვილმა გააქირავა ერთი თვის წინ. მედიასაშუალება დუისის რწმუნებულზე დაყრდნობით წერს, რომ სწორედ გორნაკაშვილი დააკავეს სამართალდამცავებმა, ჯაბრაილოვი კი დაკითხეს.
• კავკასიის ხალხთა ინტეგრაციის ფონდის პრეზიდენტმა უმარ იდიგოვმა ნეტგაზეთს უთხრა, რომ ხელისუფლების წარმომადგენლები მას ბინაში გამაგრებულებთან თავდაპირვებლად მოლაპარაკების წარმოების მიზნით დაუკავშირდნენ, თუმცა აღნიშნული შეუძლებელი აღმოჩნდა სროლის გამო.
• იდიგოვისვე ცნობით, ბინაში იმყოფებოდა 2 ბავშვი, ერთი ქალი და ორი კაცი. ქალმა და ბავშვებმა ბინიდან გაქცევა ღამით მოახერხეს.
• მერია სპეცოპერაციის ადგილზე მცხოვრებ იმ ადამაინებს, ვისი ბინაც დაზიანდა, საცხოვრებლით უზრუნველყოფს;
• ისანში სპეცოპერაცია 20 საათზე მეტ ხანს გრძელდებოდა.

რა არ ვიცით

• ვინ იყვნენ სავარაუდო დამნაშავეები;
• რა მუხლით მიმდინარეობს გამოძიება და რატომ უთვალთავლებდნენ მათ სპეცსამსახურები;
• ჰყავდათ თუ არა თანამზრახველები;
• რომელი ქვეყნიდან არიან, როდის და რა გზებით შემოვიდნენ საქართველოში;
• კავშირი ჰქონდათ თუ არა ბინის მეპატრონესთან;
• ჰქონდა თუ არა კავშირი რომელიმე ტერორისტულ ორგანიზაციასთან;
• შეიარაღების სახეობა, რაოდენობა და წარმომავლობა;
• რატომ გახდა ამ მასშტაბის სპეცოპერაციის ჩატარება საჭირო;

• გავრცელებული ინფორმაციით, სახლში, სადაც სპეცოპერაცია ჩატარდა ოჯახი ცხოვრობდა, რა ბედი ეწიათ მათ;

• მოლაპარაკების დროს რა მოთხოვნები ჰქონდათ სავარაუდო დამნაშავეებს და რატომ ჩაიშალა პროცესი;

• დილით სუს-მა გაავრცელა ინფორმაცია, რომ ანტიტერორისტული სპეცოპერაცია ტარდებოდა, საღამოს კი მხოლოდ დანაშაულებრივ ჯგუფად მოიხსენიეს. რატომ შეცვალეს სავარაუდო დამნაშავეების შესახებ ფორმულირება.