საქართველოს პრემიერ-მინისტრის, გიორგი კვირიკაშვილის თქმით, ისანში დღეს, 22 ნოემბერს, მიმდინარე სპეცოპერაციის დროს სპეცრაზმმა ყველაფერი გააკეთა, მოსახლეობიდან მსხვერპლი რომ არ ყოფილიყო. მისი თქმით, მთავარი პრიორიტეტი მოსახლეობის უსაფრთხოება იყო.

"მინდა ვთქვა, რომ ქალაქში გადაადგილება არის უსაფრთხო და არანაირი საფუძველი იმისა, რომ უსაფრთხოებასთან მიმართებაში რაიმე შიში არსებობს არ არის. ჩვენმა გმირმა ბიჭებმა შეძლეს ის, რომ გაანეიტრალეს ის საფრთხე, რომელიც შეიძლებოდა ძალიან ცუდი შედეგით დასრულებულიყო", - განაცხადა პრემიერმინისტრმა.

მან საქართველოში დღეს ჩატარებული სპეცოპერაცია სხვა ქვეყნების მსგავს შემთხვევებს შეადარა და აღნიშნა:

"ჩვენ გვინახავს სხვა ტიპის სპეცოპერაციები, სხვა ქვეყნებში სადაც შენობებს ანგრევენ და ასეთ შედეგზე არიან ორიენტირებული, ჩვენ სხვა სტილი გვაქვს, სხვა ხელწერა გვაქვს და მე მინდა მადლობა გადავუხადო ყველას ვინც თავისი სიცოცხლის ფასად მოიტანა ის შედეგი რაც ახლა გვაქვს".

თბილისში, ისანში, გაბრიელ სალოსის ქუჩაზე, სპეცოპერაცია დაახლოებით სამი საათის წინ დასრულდა. ისანში სპეცოპერაცია თითქმის 20 საათზე მეტ ხანს ტარდებოდა, რა დროსაც დაზიანდა რამდენიმე საცხოვრებელი სახლი.

სახელმწიფო უსაფრთხოების სამსახურის ინფორმაციით, თბილისში, ისანში, გაბრიელ სალოსის ქუჩაზე, სპეცოპერაციის დროს დაკავებულია ერთი პირი და ლიკვიდირებულია სამი. უწყებაში აღნიშნავენ, რომ სპეცოპერაციის დროს გარდაიცვალა ერთი სპეცრაზმელი და დაიჭრა - ორი. გარდა ამისა, დაჭრილია შინაგან საქმეთა სამინისტროს ორი თანამშრომელი.

თბილისის მერმა, კახა კალაძემ განაცხადა, რომ თბილისში, გაბრიელ სალოსის ქუჩაზე, მაცხოვრებელ ადამიანებს მერია, საჭიროების შემთხვევაში, საცხოვრებლით უზრუნველყოფს