სახელმწიფო უსაფრთხოების სამსახურის ინფორმაციით, თბილისში, ისანში, გაბრიელ სალოსის ქუჩაზე, სპეცოპერაციის დროს დაკავებულია ერთი პირი და ლიკვიდირებულია სამი. სუს-ის ადმინისტრაციის ხელმძღვანელის, ნინო გიორგობიანის ბრიფინგი რამდენიმე წუთის წინ გაიმართა.

უწყების ინფორმაციით, სპეცოპერაციის დროს გარდაიცვალა ერთი სპეცრაზმელი და დაიჭრა - ორი. გარდა ამისა, დაჭრილია შინაგან საქმეთა სამინისტროს ორი თანამშრომელი.

უწყებაში ამბობენ, რომ ამ ეტაპზე ლიკვიდირებული პირების იდენტიფიცირება მიმდინარეობს. წინასწარი ინფორმაციით კი, ისინი საქართველოს მოქალაქეები არ იყვნენ.

"ამ პირებთან მიმართებაში დაკვირვება უკანასკნელი რამდენიმე კვირის განმავლობაში ხორციელდებოდა. საერთაშორისო ანტიტერორისტული თანამშრომლობის ფარგლებში, აღნიშნული ჯგუფის წევრების სრული იდენტიფიცირების მიზნით, მიმდინარეობს შესაბამისი ღონისძიებები დანაშაულებრივი კავშირის დადგენის მიზნით", - განაცხადა გიორგობიანმა.

გაბრიელ სალოსის ქუჩაზე, სპეცოპერაცია დაახლოებით ორი საათის წინ დასრულდა. ისანში სპეცოპერაცია თითქმის 22 საათი ტარდებოდა.

თბილისის მერმა, კახა კალაძემ განაცხადა, რომ თბილისში, გაბრიელ სალოსის ქუჩაზე, მაცხოვრებელ ადამიანებს მერია, საჭიროების შემთხვევაში, საცხოვრებლით უზრუნველყოფს.