საქართველო-ევროკავშირის ასოცირების განახლებული (2017-2020 წლების) დღის წესრიგი ამოქმედდა.

როგორც საგარეო საქმეთა სამინისტროს მიერ გავრცელებულ განცხადებაში წერია, ახალი დღის წესრიგი საქართველოს საშუალებას აძლევს 2020 წლამდე დაუახლოვდეს ევროსტანდარტებს.

ასოცირების დღის წესრიგი საქართველო-ევროკავშირის ასოცირების შეთანხმების ძირითადი განმახორციელებელი ინსტრუმენტია.

იგი მოიცავს საქართველოსა და ევროკავშირს შორის შეთანხმებულ კონკრეტულ პრიორიტეტებს, ასოცირების შეთანხმებით გათვალისწინებული თანამშრომლობის ყველა სფეროში.

სამინისტროს განცხადებაში ნათქვამია, რომ განახლებული დღის წესრიგი ითვალისწინებს არასამთავრობო ორგანიზაციების კონკრეტულ პრიორიტეტებს, ისეთ სფეროებში როგორიცაა:

  1. დემოკრატია, ადამიანის უფლებები, კარგი მმართველობა და ინსტიტუციების გაძლიერება;
  2. საგარეო და უსაფრთხოების პოლიტიკა;
  3. მართლმსაჯულება, თავისუფლება და უსაფრთხოება;
  4. ვაჭრობა და ვაჭრობასთან დაკავშირებული საკითხები;
  5. ეკონომიკური განვითარება და საბაზრო შესაძლებლობები;
  6. კომუნიკაციები, ენერგოეფექტურობა, გარემოს დაცვა, კლიმატი და სამოქალაქო დაცვა;
  7. მობილობა და ხალხთა შორის კავშირები.

საგარეო უწყების ინფორმაციით, პრიორიტეტების განხორციელების პროცესში ევროკავშირი მზად არის ფინანსურად თუ ტექნიკურად დაეხმაროს საქართველოს.

მათივე ცნობით, ევროკავშირმა შეიმუშავა ახალი მრავალწლიანი ჩარჩო (2017-2020) – Single Support Framework, რომელიც ითვალისწინებს ასოცირების დღის წესრიგის განხორციელების მხარდაჭერას.

ასოცირების ახალ დღის წესრიგში ცალკე პრიორიტეტად გამოიყო უსაფრთხოების სფეროს მიმართულება და კონფლიქტის მშვიდობიან გადაწყვეტას, რომელიც რუსეთის საოკუპაციო პოლიტიკის ფონზე საქართველო-ევროკავშირის თანამშრომლობის უცვლელი პრიორიტეტია.