შოტლანდიის პირველი მინისტრი, ადგილობრივი ნაციონალური პარტიის ლიდერი, ნიკოლა სტერჯენი უკმაყოფილოა რეფერენდუმის შედეგით, რომლის მიხედვითაც დიდმა ბრიტანეთმა ხმა მისცა ევროკავშირიდან გასვლას:

„მჯერა, რომ გადაწყვეტილება, რომელიც მიიღო გაერთიანებულმა სამეფომ, იყო არასწორი, შეცდომა“.

სტერჯენის თქმით, შოტლანდიის მთავრობა, საჭიროების შემთხვევაში, ქვეყნის დამოუკიდებლობის შესახებ რეფერენდუმს ჩაატარებს. ეს იქნება მეორე რეფერენდუმი მას შემდეგ, რაც 2014 წელს შოტლანდიამ გაერთიანებულ სამეფოში დარჩენა არჩია.

„ჩვენ ძალიან მკაფიოდ ვთქვით, რომ არ გვინდა ევროკავშირის დატოვება. მე გავაკეთებ ყველაფერს, რომ ასე არ მოხდეს. რეფერენდუმი დამოუკიდებლობის შესახებ სავსებით მოსალოდნელია“.

ევროკავშირში დარჩენას შოტლანდიელების 62%-მა დაუჭირა მხარი, წინააღმდეგი კი 38% იყო. ევროკავშირში დარჩენას მხარი ასევე დაუჭირა ლონდონელი ამომრჩევლის 60%-ზე მეტმა, თუმცა, ბრიტანეთის ჩრდილოეთ პროვინციების მოსახლეობის გადაწყვეტილებამ მნიშვნელოვანი გავლენა მოახდინა რეფერენდუმის შედეგზე, რომლის მიხედვითაც, 52% ევროკავშირიდან გასვლის მომხრეა.