თბილისის საქალაქო სასამართლოში "კანონიერი ქურდის" ძმის, ლევან ჯანგველაძის მკვლელობის საქმეზე სასამართლო პროცესი გაიმართა. პროცესზე მოწმის სახით პარტია ალტ-ინფოს ერთ-ერთი დამფუძნებელი და ბიზნესმენი კოკა მორგოშია დაიკითხა.

რადიო თავისუფლების ინფორმაციით, რუსეთი ლევან ჯანგველაძეს "პოლიტიკურ აქტიურობას სთავაზობდა", რაზეც ყოფილ გენერალურ პროკურორს, ოთარ ფარცხალაძეს "შფოთვები ჰქონდა". მორგოშიას განმარტებით, ფარცხალაძის შეშფოთება გამოწვეული იყო იმ ფაქტით, რომ მას "ეს მიმართულება დიდი ხანი უნდოდა".

"[ჯანგველაძე გავაფრთხილე] ფარცხალაძეც გაიგებს, რომ შენ ამას გთავაზობენ, არადა ფარცხალაძეს უნდოდა ეგ მიმართულება-მეთქი [...]

ლევან ჯანგველაძე მეუბნებოდა, ოთარ ფარცხალაძეს ჩემთან დაკავშირებით ძალიან აქვს შფოთვებიო, ის ამაზე ღიად საუბრობდა. ფარცხალაძის გარეშე ქალაქში არაფერი ხდებოდა. თბილისის ქუჩა ჩაბარებული ჰქონდა ფარცხალაძეს, საბაჟოც მისი იყო, პროკურატურაც, პოლიციაც.

ლევანი კრიმინალური ავტორიტეტი არ ყოფილა, მაგრამ დაახლოებული იყო ადამიანებთან, ვინმეს რამე პრობლემა რომ ეთქვა, შეეძლო მოეკითხა. არ ჰქონდა არც ფინანსების პრობლემა. ეს იცოდა ოთარ ფარცხალაძემაც.

ოთარ ფარცხალაძე იყო მოსული ლევან ჯანგველაძის პანაშვიდზე, თუმცა მე არ შევხვედრივარ.

რაც შეეხება დავით მიქაძეს, მასთან კაზინოს ფულის გამო დაპირისპირებაზე თავად ლევანმა მომიყვა. მითხრა, რომ აპირებდა მანქანის ბრონირებასაც," — განაცხადა მორგოშიამ (წყარო ტვ პირველი).

მორგოშიას ჩვენების მიხედვით, ჯანგველაძემ უარი განაცხადა რუსეთის ფედერაციის შემოთავაზებაზე და თქვა, "ქვეყნის წინააღმდეგ არ წავალო".

"მე მითხრა ეს ამბავი ლევანმა. მე ვუთხარი, ჩემი აზრით, არასწორს აკეთებ, რადგან გთავაზობენ, უნდა ჩაერთო, შენი გავლენა სისტემის გარეთ რომ იყოს გასული, აქაურობა ვერ აიტანს და პრობლემები გექნება-მეთქი," — თქვა მორგოშიამ.

გარდა ჯანგველაძის მკვლელობის საქმის დეტალებისა, მორგოშიამ სასამართლო პროცესზე ფარცხალაძესთან ურთიერთობაზეც ისაუბრა. მორგოშიას განცხადებით, ყოფილ პროკურორთან მას შემდეგ დაეძაბა ურთიერთობა, რაც მან ტელევიზია "ალტ-ინფოს" წილი მოითხოვა.

შეგახსენებთ, შსს-ს ცნობით, ბიზნესმენ ლევან ჯანგველაძის მკვლელობას ყოფილი გენერალური პროკურორი ოთარ ფარცხალაძე ხელმძღვანელობდა და მისი ლიკვიდაცია ძმებ მიქაძეებთან ერთად დაგეგმა. ამის შესახებ ბრიფინგზე შს მინისტრის მოადგილემ, ალექსანდრე დარახველიძემ 29 დეკემბერს განაცხადა.

ლევან ჯანგველაძის მკვლელობა 2025 წლის 14 მარტს გვიან ღამით ვაკეში, ჭავჭავაძის გამზირზე მოხდა. მას შემდეგ, რაც ლევან ჯანგველაძე ახლობლის გასვენებიდან ბრუნდებოდა, გზის გადაკვეთისას გელა უძილაურმა მას ცეცხლი გაუხსნა. ბრმა ტყვიისგან გამვლელი ფეხში დაიჭრა.