"კანონიერი ქურდ" მერაბ ჯანგველაძის ძმის, ბიზნესმენ ლევან ჯანგველაძის შეკვეთითა და ანგარებით მკვლელობის ორგანიზებაში ბრალდებული ძმები — დავით და გიორგი მიქაძეები, ასევე გიორგი ჯოხაძე სასამართლომ დამნაშავედ ცნო. მოსამართლემ რომეო ტყეშელაშვილმა სამივე მათგანს უვადო თავისუფლების აღკვეთა მიუსაჯათ.

აღსანიშნავია, რომ სამი მსჯავრდადებულიდან მხოლოდ გიორგი მიქაძე იმყოფება საქართველოში. ის 9 თვეა წინასწარ პატიმრობაშია. დავით მიქაძე და გიორგი ჯოხაძე საზღვარგარეთ მიმალვაში არიან.

ძმებ მიქაძეებსა და გიორგი ჯოხაძეს ბრალი სისხლის სამართლის კოდექსის 25-109 მუხლის "ნ" ქვეპუნქტით ჰქონდათ წარდგენილი, რაც ანგარებითა და შეკვეთით მკვლელობის ორგანიზებას გულისხმობს. გარდა ამისა, გიორგი ჯოხაძეს ბრალი წარდგენილი ჰქონდა ასევე სისხლის სამართლის კოდექსის 236-ე მუხლის მე-6 ნაწილის "ა" და "ბ" ქვეპუნქტით, რაც ცეცხლსასროლი იარაღისა და საბრძოლო მასალის ჯგუფურად მართლსაწინააღმდეგო შეძენას, შენახვასა და გასაღებას გულისხმობს.

შეგახსენებთ, მკვლელობა 2025 წლის 14 მარტს, გვიან ღამით, ვაკეში, ჭავჭავაძის გამზირზე მოხდა. მას შემდეგ, რაც ლევან ჯანგველაძე ახლობლის გასვენებიდან ბრუნდებოდა, გზის გადაკვეთისას გელა უძილაურმა მას ცეცხლი გაუხსნა.

მედიაში გავრცელებული ინფორმაციით, ძმები მიქაძეები კრიმინალურ სამყაროსთან და ოთარ ფირცხალაძესთან დაახლოებული პირები არიან.