უნგრეთმა 10 რუს დიპლომატს, რომლებიც "ვენის კონვენციის თანახმად დიპლომატებისთვის მიუღებელ საქმიანობას ეწეოდნენ", ქვეყნის დატოვება მოსთხოვა. ამის შესახებ უნგრეთის საგარეო საქმეთა მინისტრმა ანიტა ორბანმა განაცხადა.

მისი თქმით, მიღებული გადაწყვეტილება უნგრეთის "უსაფრთხოებისა და სუვერენიტეტის დაცვას ემსახურება".

უნგრეთის ხელისუფლებას რუსი დიპლომატების მიერ ჩადენილი კონკრეტული ქმედებები არ დაუკონკრეტებია.

"დღეს, ჩემი დავალებით, საგარეო საქმეთა სამინისტროს შესაბამისმა ხელმძღვანელმა რუსეთის ელჩს უნგრეთში აცნობა, რომ უნგრეთის ხელისუფლების შეფასებით, რუსეთის დიპლომატიური მისიის 10 თანამშრომელი უნგრეთში ისეთ საქმიანობას ეწეოდა, რომელიც ვენის კონვენციის საფუძველზე დიპლომატისთვის მიუღებელია.

ამის გამო უნგრეთის მხარემ აღნიშნულ პირებს ქვეყნის დატოვება მოსთხოვა.

ეს გადაწყვეტილება უნგრეთის უსაფრთხოებასა და სუვერენიტეტს იცავს.

ეს არ ნიშნავს რუსეთთან დიპლომატიური ურთიერთობების გაწყვეტას. უნგრეთს კვლავ სურს აუცილებელი დიალოგის შენარჩუნება, ურთიერთპატივისცემისა და წესების დაცვის საფუძველზე", — წერს ანიტა ორბანი სოციალირ ქსელში.