აზერბაიჯანმა CNN-ის წინააღმდეგ აშშ-ის ფედერალურ სასამართლოში სარჩელი შეიტანა. მიზეზი მიმდინარე წლის ივნისში გამოქვეყნებული სტატიაა ("ირანის ომის დროს ისრაელმა აზერბაიჯანში სამხედროები გაგზავნა — წყაროების ცნობით, ეს რეგიონში მოქმედი საიდუმლო ქსელის ნაწილი იყო"), რომელშიც ტელეკომპანია ამტკიცებდა, რომ ირანის წინააღმდეგ აშშ-ისა და ისრაელის ომის პიკში ისრაელმა სამხედროები აზერბაიჯანში განათავსა. ინფორმაციას OC media ავრცელებს.

აზერბაიჯანულმა პროსამთავრობო საინფორმაციო სააგენტო Report-მა დაწერა, რომ ბაქომ CNN-ს სტატიის უარყოფა სამჯერ მოსთხოვა, თუმცა ტელეკომპანიამ ამაზე უარი თქვა.

სადავო სტატია ოთხ ანონიმურ წყაროს ეყრდნობოდა და ამტკიცებდა, რომ ისრაელმა აზერბაიჯანში "ელიტარული სამხედრო და სადაზვერვო დანაყოფები" განათავსა, როგორც "ახლო აღმოსავლეთში არსებული ფარული ობიექტების ქსელის ნაწილი, ირანის წინააღმდეგ ოპერაციების ხელშესაწყობად".

CNN-თან მოსაუბრე ორი წყაროს ცნობით, ისრაელის ძალები სამხრეთ აზერბაიჯანის რამდენიმე ლოკაციაზე მოქმედებდნენ, მათ შორის ერთ-ერთ ადგილას, რომელიც ირანის ქალაქ თაბრიზიდან (რომელსაც კონფლიქტის დროს ისრაელმა დარტყმა მიაყენა) დაახლოებით 100 კილომეტრში მდებარეობს.

"სპეციალური დანაყოფები ასევე განლაგებულნი იყვნენ აღნიშნულ ლოკაციაზე და ახორციელებდნენ სადაზვერვო მისიებსა და დრონებით ოპერაციებს, რამაც ისრაელს ომის დროს ჩრდილოეთ ირანის მეთვალყურეობისთვის ღირებული პოზიცია მისცა", — იტყობინებოდა CNN.

სტატიას წინ უძღოდა ვარაუდები, თითქოს აზერბაიჯანის ტერიტორია ისრაელმა 2025 წლის მოკლევადიანი ისრაელ-ირანის ომის დროს ირანის წინააღმდეგ სამხედრო ოპერაციების ჩასატარებლად გამოიყენა. აღნიშნული ბაქომ უარყო.

2026 წლის იანვარში, აზერბაიჯანის საგარეო საქმეთა მინისტრმა ჯეიჰუნ ბაირამოვმა თავის ირანელ კოლეგას, სეიდ აბას არაღჩის კიდევ ერთხელ დაუდასტურა, რომ აზერბაიჯანის ტერიტორიას "არცერთი სახელმწიფო" "არასდროს" გამოიყენებს ირანზე თავდასხმების განსახორციელებლად.

CNN-ის 2026 წლის ივნისის სტატიის საპასუხოდ, აშშ-ში აზერბაიჯანის საელჩომ უარყო ის, რასაც "უსაფუძვლო ბრალდებები უწოდა.

ეს განცხადება, პირველადი სტატიის გამოქვეყნების შემდეგ აზერბაიჯანის მედიის განვითარების სააგენტოს შემდგომ კომენტარებთან ერთად, შეყვანილი იყო CNN-ის სტატიაში.

მიუხედავად ამისა, Report წერს: "თუმცა CNN-ი დაჰპირდა აზერბაიჯანის მოთხოვნების განხილვას, ამ პერიოდში არანაირი ზომა არ მიუღია და აღნიშნული ბრალდებები არ უარუყვია", რამაც სარჩელის აღძვრა გამოიწვია.