ორი წლის წინ კოალიცია ცვლილებისთვის ერთ-ერთ ლიდერ ნიკა მელიაზე თავდასხმის ფაქტზე გამოძიება განახლდა. საქმე ეხება 2024 წლის 12 აგვისტოს, ქალაქ სამტრედიაში, წინასაარჩევნო კამპანიის ფარგლებში ჩასულ ნიკა მელიას, რომელსაც პირდაპირ ეთერში პირი თავს დაესხა.

ოპოზიციონერი პოლიტიკოსის ადვოკატის, ბექა კვინიკაძის განცხადებით, მომხდარზე შსს-მ თავდაპირველად გამოძიება 126-ე მუხლით დაიწყო, რაც ძალადობას გულისხმობს. ორი წლის შემდეგ პროკურატურამ მუხლი გადააკვალიფიცირა და საქმის გამოძიება 162-ე პრიმა მუხლის პირველი ნაწილით მიმდინარეობს, რაც საარჩევნო კამპანიაში ძალადობით ხელის შეშლას გულისხმობს. ადვოკატის განცხადებით, დღეს მომხდარზე მოწმეები დაკითხეს.

საგამოძიებო უწყებამ ადვოკატს განუცხადა, რომ ორი წლის წინ დაკითხვის დროს აღნიშნულმა პირმა ბრალი აღიარა. უწყება უარყოფს საქმის გამოძიების გაჭიანურებას და მათი ვერსიით, ორი წელი ჰაბიტოსკოპიური ექსპერტიზის შედეგებს ელოდებოდნენ, რაც თავდასხმის ამსახველ ვიდეოში პირის ვინაობას დაადგენდა.

"როგორც გამომძიებელმა მითხრა, თავდამსხმელმა გამოკითხვის დროს აღიარა ჩადენილი ქმედება. ამბობს, რომ მან ჩაიდინა პოლიტიკური ნიშნით ეს დანაშაული და ასევე ამბობს, რომ თითქოს იქ მასზეც განხორციელდა რაღაც კონკრეტული ძალადობა, ცემეს, მაგრამ რაიმე დაზიანება, ცემის კვალი მას არ აღენიშნება.

სამართლებრივად, რომ აქეთ მხარეს ვინმე აქტივისტი, მხარდამჭერი მიეცეს პასუხისგებაში, ამის სამართლებრივი საფუძველი რეალურად არ არსებობს, მაგრამ გამორიცხული, რა თქმა უნდა, არაფერი არ არის.

როგორც გამომძიებელი ამბობს, რეალურად მათ მხრიდან ხელოვნურად გაჭიანურება ამ საქმის არ მომხდარა, ჰაბიტოსკოპიური ექსპერტიზის შედეგებს ელოდებოდნენ, რომ ნამდვილად ეს პირი, ვინც არის დანაშაულის ჩამდენი პირი, მან ჩაიდინა დანაშაული," — განაცხადა ადვოკატმა.

ადვოკატ გიორგი კონდახიშვილის შეფასებით, ნიკა მელიაზე თავდასხმის საქმის ორი წლის შემდეგ გამოძიებით ხელისუფლება "ბალანსის შექმნას" ცდილობს.

"მართლმსაჯულება ხორციელდება ერთმნიშვნელოვნად პოლიტიკური მიზანშეწონილობიდან გამომდინარე. წარმოიდგინეთ, ნიკას მიმართ თავდასხმა მოხდა დაახლოებით ორი წლის წინ და დღეს, რატომღაც, დასჭირდა ხელისუფლებას, რომ აღნიშნული საქმის აქტივიზაცია მოეხდინათ. რატომ? ჩემი აზრით, ქმნიან ეგრეთ წოდებულ ბალანსს, თითქოსდა იძიებენ საქმეებს, რომ აი ნიკასთან მიმართებით, რომ შეიქმნას ბალანსი — ჩვენ მხოლოდ ნიკა მელიას კი არ ვდევნით პოლიტიკურად, არამედ მასზე თავდასხმასაც, ასე ვთქვათ, ვასამართლებთ.

ეს იმ ფონზე, როდესაც უკვე ჩვენ მესამე განაჩენს ველოდებით რამდენიმე დღეში, სჭირდება ხელისუფლებას ეგრეთ წოდებული მოჩვენებითი ბალანსის შესაქმნელად, რომ ობიექტური გამოძიება მიმდინარეობს როგორც ერთ მხარეს, ასევე მართლმსაჯულება ხორციელდება ნიკა მელიასთან მიმართებით. და ეს, რა თქმა უნდა, არის ფარსი, ეს არის თვალშისაცემი, ეს არის ორჯერ ორი ოთხი, იკითხება... არავითარი ორი წელი არ სჭირდება გამოძიებას, რომ დაადგინო პირი, რომელმაც მოახდინა პოლიტიკურ ლიდერზე თავდასხმა პირდაპირ ეთერში და ორი წლის ლოდინი არ სჭირდება ამის დადგენას," — განაცხადა ადვოკატმა.

შეგახსენებთ, ოპოზიციონერი პოლიტიკოსი მესამე განაჩენის მოლოდინშია. საქმე მოსამართლე თორნიკე ქოჩქიანის შეურაცხყოფას ეხება. საქმეში ნიკა მელიას წინააღმდეგ არსებობს ვიდეომტკიცებულება, სადაც ისმის ფრაზა "მოსამართლე *ლე ხარ".

გარდა ამისა, ნიკა მელია ასევე ფიგურირებს ე.წ. საბოტაჟის საქმეზე. მელიას ბრალი საქართველოს სისხლის სამართლის კოდექსის 318-ე მუხლის პირველი ნაწილით აქვს წაყენებული, რაც სახელმწიფო საბოტაჟს გულისხმობს.

POG: სახელმწიფო გადატრიალებაზე სააკაშვილს, ვაშაძეს, გვარამიას, მელიას, ჯაფარიძეს, ხოშტარიას, ხაზარაძეს-ჯაფარიძეს ბრალი წარედგინათ

მანამდე, 2025 წლის 27 ივნისს, ნიკა მელიას საგამოძიებო კომისიაზე გამოუცხადებლობისთვის 8 თვით თავისუფლების აღკვეთა მიესაჯა და 2 წლის ვადით აეკრძალა თანამდებობის დაკავება.

• წულუკიანის კომისიაზე გამოუცხადებლობის გამო ნიკა მელიას 8 თვით პატიმრობა მიესაჯა

2025 წლის 26 ნოემბერს, მელიას მოსამართლე ირაკლი შვანგირაძისთვის წყლის შესხმისთვის 1 წლითა და 6 თვის ვადით თავისუფლების აღკვეთა მიესაჯა.

• სასამართლომ ნიკა მელია მოსამართლისთვის წყლის შესხმის ფაქტზე დამნაშავედ ცნო და 1 წლითა და 6 თვის ვადით თავისუფლების აღკვეთა მიესაჯა