მას შემდეგ, რაც ბარბის შემოსავალმა დაახლოებით $1.5 მილიარდს მიაღწია, ოსკარის 8 ნომინაცია მოიპოვა და 2023 წლის ზაფხული გაავარდისფერა, ფილმის გაგრძელების გადაღება თითქმის გადაწყვეტილი იყო. თუმცა, The New York Times-ის ცნობით, ანაზღაურებასთან დაკავშირებული უთანხმოების გამო, ბარბი 2-ზე მუშაობა შეფერხდა, რამაც მთელი პროექტის მომავალი საფრთხის ქვეშ დააყენა.

Warner Bros. Discovery-ის ხელმძღვანელმა, დევიდ ზასლავმა, უარი თქვა მარგო რობისა და რაიან გოსლინგისთვის ისეთი სოლიდური კონტრაქტების გაფორმებაზე, რომლებიც მეორე ფილმის მოგებიდან წილის მიღებასაც ითვალისწინებდა. გოსლინგი, რომელმაც კენის როლისთვის ოსკარის ნომინაცია მოიპოვა, ანაზღაურების $20 მილიონამდე გაზრდას ითხოვს.

სტუდია თვეების განმავლობაში აწარმოებდა მოლაპარაკებებს მთავარი როლის შემსრულებელ მსახიობებთან და მათ მოგებიდან წილს სთავაზობდა იმ შემთხვევაში, თუ ფილმი კინოგაქირავებაში გარკვეულ ფინანსურ ნიშნულებს მიაღწევდა. თუმცა, დევიდ ზასლავმა ასეთი გარიგების დამტკიცებაზე უარი თქვა, რადგან შეთანხმების პირობები "ზედმეტად გულუხვად" მიიჩნია.

ფოტო: Getty

The New York Times-ის მიხედვით, გრეტა გერვიგსა და მის ქმარს (რომელიც ასევე ბარბის თანასცენარისტია), ნოა ბაუმბახს, ახალი ფილმის იდეა უკვე აქვთ. თუმცა, ავტორები დეტალების გამჟღავნებას არ ჩქარობენ და სტუდიასთან კონტრაქტების გაფორმებას ელოდებიან. თავის მხრივ, Warner Bros. მაქსიმალურად ცდილობს, კონტრაქტები დროულად გააფორმოს, რადგან დეკემბერში საავტორო უფლებები კვლავ Mattel-ს უბრუნდება. თუკი დათქმულ დრომდე სტუდია ბარბის გუნდთან შეთანხმებას ვერ მიაღწევს, Mattel იძულებული გახდება, პროექტი ნულიდან დაიწყოს, რაც სრულიად ახალ რეჟისორს, სამსახიობო შემადგენლობასა და კონცეფციას გულისხმობს.