"როსსელხოზნადზორმა" (რუსეთის ვეტერინარული და ფიტოსანიტარიული ზედამხედველობის ფედერალურმა სამსახურმა) სომხური ხილისა და ბოსტნეულის შემოწმება დაიწყო. ამის შესახებ აღნიშნული სააგენტოს ხელმძღვანელმა სერგეი დანკვერტმა პარასკევს, 22 მაისს, გადაცემა "ვესტისთან" ინტერვიუში განაცხადა . სომხური ყვავილების იმპორტის აკრძალვა იმავე დღეს "რუსეთის ფიტოსანიტარიული კეთილდღეობისა და ექსპორტის პოტენციალის დასაცავად" ამოქმედდა. გარდა ამისა, "პრობლემები" წარმოიშვა სომხურ ხილსა და ბოსტნეულთან დაკავშირებით.

"საკითხი ის არის, რომ პრობლემა მხოლოდ ყვავილებს არ ეხება. ჩვენ ასევე გვაქვს პრობლემები ბოსტნეულსა და ხილთან დაკავშირებით", — ციტირებს დანკვერტს The Insider.

მათი მონაცემებით, 2025 წლის მაისიდან ნოემბრამდე, სომხეთმა რუსეთში 40 მილიონ ევროზე მეტი ღირებულების ხილი და 50 მილიონ ევროზე მეტი ღირებულების ბოსტნეული გაიტანა.

ყვავილების შემდეგ, რუსეთში სომხეთიდან მინერალური წყალიც აიკრძალა. "როსპოტრებნადზორმა"(მომხმარებელთა უფლებების დაცვისა და ადამიანის კეთილდღეობის ზედამხედველობის ფედერალურმა სამსახურმა) რუსეთში სომხური ჯერმუკის მინერალური წყლის იმპორტი და გაყიდვა აკრძალა.

"წყალში აღმოჩნდა ბიკარბონატის (იონის), ქლორიდების და სულფატების ჭარბი რაოდენობა. პროდუქტის სამკურნალო თვისებების შესახებ შეცდომაში შემყვანმა ინფორმაციამ შეიძლება გამოიწვიოს არაეფექტური მკურნალობა და ჯანმრთელობის გაუარესება", — განაცხადა რუსეთის საზედამხედველო სააგენტომ 22 მაისის საღამოს.

გამოცემა "მედუზას" ცნობით, ეს არ არის პირველი შემთხვევა, როდესაც "როსპოტრებნადზორმა" ამ მინერალურ წყალზე შეზღუდვები დააწესა. აპრილის ბოლოს, სააგენტომ აკრძალა 2025 წლის 23 ოქტომბრიდან 2026 წლის 17 თებერვლამდე პერიოდში წარმოებული წყლის იმპორტი და გაყიდვა იმავე "ბიკარბონატის" მიზეზით.

გამოცემა აღნიშნავს, რომ მოსკოვი წლების განმავლობაში რეგულარულად აწესებდა აკრძალვებს გარკვეული ქვეყნების პროდუქტებზე, რომლებთანაც მისი ურთიერთობები უარესდებოდა. ამჟამად, რუსეთს უთანხმოება აქვს სომხეთთან იმის გამო, რასაც რუსეთის ხელისუფლება პრემიერმინისტრ ნიკოლ ფაშინიანის მთავრობას პროდასავლურად მიიჩნევს. გარდა ამისა, კრემლმა არაერთხელ განაცხადა, რომ ერევანი ერთდროულად არ შეიძლება იყოს ევროკავშირისა და ევრაზიული ეკონომიკური კავშირის (EAEU) წევრი.