თბილისის საქალაქო სასამართლომ ქართული ოცნების მხარდამჭერი რეჟისორის, გოგა ხაინდრავას სარჩელი დააკმაყოფილა და ტელეკომპანია "ფორმულას" "მორალური ზიანის ასანაზღაურებლად" 10 000 ლარით გადახდა დააკისრა. გადაწყვეტილება მოსამართლე ლიანა კაჟაშვილმა მიიღო.

ტელეკომპანიის იურისტის, ეთო ქათამაძეს განცხადებით, ისინი სამართლებრივ დავას ყველა ინსტანციაში გაასაჩივრებენ და დავას სტრასბურგში გააგრძელებენ. მისივე შეფასებით, მოსამართლემ სასამართლო პროცესზე არ ახსნა, რატომ დააკმაყოფილა გოგა ხაინდრავას სარჩელი.

"ამ სასამართლოს პირობებში განაჩენი ნამდვილად არ ყოფილა გასაკვირი. თუმცა მიგვაჩნია, რომ ამ ქვეყანაში თავისუფალი ჟურნალისტიკა, კეთილსინდისიერი ჟურნალისტიკა ასე არ უნდა ისჯებოდეს. შესაბამისად, სრულად ამოვწურავთ ქვეყნის შიგნით არსებულ სასამართლო პროცესებს და გავაგრძელებთ სტრასბურგში დავასაც.

მიგვაჩნია, რომ ეს გადაწყვეტილება არის სრულად დაუსაბუთებელი. დღეს მოსამართლისგან ვერ მოვისმინეთ ვერც ერთი განმარტება, რას ეყრდნობოდა მისი გადაწყვეტილება. უბრალოდ მშრალად გამოცხადდა ის, რომ დაკმაყოფილდა უარყოფის შესახებ ესა და ეს განცხადება. თუმცა ველოდებოდით ერთი-ორი სიტყვით მაინც დასაბუთებას, თუ რატომ მიიღო მოსამართლემ ეს გადაწყვეტილება, რაზეც ასევე შეიკავა თავი [მოსამართლემ] და ესეც მიუთითებს ამ გადაწყვეტილების აბსურდულობას," — განაცხადა იურისტმა.

გოგა ხაინდარავამ ტელეკომპანია "ფორმულას" 17 იანვარს გასული სიუჟეტისთვის უჩივლა, სადაც საუბარი იყო იმაზე, რომ 2016-2017 წლებში გოგა ხაინდრავას, სუს-თან შეთანხმებით, ინდოეთისა და პაკისტანის მოქალაქეები საქართველოში გარკვეული თანხის სანაცვლოდ შემოჰყავდა.

18 ივნისს, ხაინდრავას საჩივრის შემდეგ, პროკურატურამ ტელეკომპანია "ფორმულას" წინააღმდეგ ცრუ დასმენის ფაქტზე გამოძიება დაიწყო. აღნიშნულ საქმეზე გამოკითხვები მიმდინარეობს.

"მედიაჩეკერის" ინფორმაციით, გოგა ხაინდრავას საქმის არსებითი განხილვისას განაცხადა, რომ ის ამ ფულს იმ არასამთავრობო ორგანიზაციის შექმნისთვის გამოიყენებს, რომელიც "მედიატერორისგან დაიცავს მოქალაქეებს".