ქართული ოცნების მხარდამჭერი რეჟისორი გოგა ხაინდარავა ტელეკომპანია ფორმულას 17 იანვარს გასული სიუჟეტისთვის უჩივის. ფორმულას სიუჟეტში საუბარი იყო იმაზე, რომ 2016-2017 წლებში გოგა ხაინდრავას, სუს-თან შეთანხმებით, ინდოეთისა და პაკისტანის მოქალაქეები საქართველოში გარკვეული თანხის სანაცვლოდ შემოჰყავდა.

21 იანვარს გამართულ ბრიფინგზე ხაინდარავამ ფორმულას 3 კვირის წინ ეთერში გასულ სიუჟეტზეც ისაუბრა. ხაინდარავას განცახდებით, მან სიუჟეტში "16 სიცრუე და ცილისწამება" მოისმინა და თქვა, რომ ტელეკომპანიას ცილისწამებისთვის სასამართლოში უჩივლებს.

"წინა შაბათს ამ "სიცრუის ფორმულამ" გააკეთა სიუჟეტი, სადაც დამაბრალა ისეთი რამ, რაც ნორმალურ ადამიანს თავში არ მოუვა. დააბრალო ქართველ კაცს, რომ მან ფულის საფასურად 2 000 ინდოელი და პაკისტანელი არალეგალურად შემოიყვანა საქართველოში და ამაში 4 მლნ აიღო, უნდა იყო კეზერაშვილი ან თარგამაძე.

მე მინდა დავპირდე ამ სიცრუის ფორმულას, რომ მე დავამთავრებ მათ და არა მარტო მათ ბოროტებას. ვიქნები არა მარტო მე, არამედ ქართული საზოგადოების დიდი ნაწილი, რომელიც გაერთიანდება ამ ფონდში და ყველანაირად დაიცავს საკუთარ თავს და ოჯახებს ამ ბოროტებისგან," — თქვა ხაინდრავამ.

ხაინდარავა ტელეკომპანიისგან ფინანსურ კომპენსაციას ითხოვს, რადგან შემდეგ ფონდი შექმნას, რომელიც ტელეკომპანიის მიერ გავრცელებული ცრუ ინფორმაციით დაზარალებულ მოქალაქეებს დაიცავს.

შეგახსენებთ, "შაბათის ფორმულას" წამყვანმა, დავით ქაშიაშვილმა ტელეეთერში განაცხადა, რომ სიუჟეტის გასვლის შემდეგ მუქარის შემცველი ტექსტი მიიღო და აღნიშნულ ფაქტთან დაკავშირებით შსს-ს მოუწოდა, გამოძიება დაიწყონ.

ქაშიაშვილის მიერ სოციალურ ქსელში უცნობი პირისგან მიღებულ მუქარას "ჟურნალისტური ეთიკის ქარტია" გამოეხმაურა. ქარტია წერს, რომ საქართველო იმ ქვეყანათა რიგშია, სადაც ჟურნალისტთა უსაფრთხოება დაცული არ არის და აღნიშნავს, რომ ქარტიისათვის ჟურნალისტის მიმართ გაჟღერებული მუქარის ეს შემთხვევა შემაშფოთებელია. ორგანიზაცია მოუწოდებს "შსს-ს, დაუყოვნებლივ დაინტერესდეს ამ ფაქტით, სწრაფად გამოიძიოს და, პარალელურად, ჟურნალისტის უსაფრთხოება უზრუნველყოს".