6-დღიანი ძებნის შემდეგ, თბილისის ზღვაში დაკარგული 15 წლის მოზარდის ცხედარი იპოვეს. ინფორმაციას "ინტერპრესნიუსი" ავრცელებს.

საგანგებო სიტუაციების სამსახურის ცნობით, დაკარგული მოზარდი მყვინთავებმა 30 მეტრის სიღრმეზე იპოვეს.

"საგანგებო სიტუაციების მართვის სამსახურის მყვინთავებმა, თბილისის ზღვაში რამდენიმე დღის წინ დაკარგული 15 წლის მოზარდის ცხედარი, ზღვაში, 30 მეტრის სიღრმეზე იპოვეს.
საძიებო სამუშაოები უწყვეტ რეჟიმში, ყველა შესაბამისი წყალზე სამაშველო სპეც-ტექნიკის და აღჭურვილობის გამოყენებით მიმდინარეობდა", — განაცხადა საგანგებო სიტუაციების მართვის სამსახურმა.

MarneuliNews-ის ცნობით, უბედური შემთხვევა 23 აგვისტოს მოხდა. გარდაცვლილი მოზარდი უმუდ სოფიევია. ის გარდაბნის მუნიციპალიტეტის სოფელ ყარაჯალარის მკვიდრი იყო. ადგილობრივების ინფორმაციით, ახალგაზრდა თბილისის ზღვაზე თანატოლებთან ერთად საცურაოდ იმყოფებოდა.