სომხეთის უდიდესი ბანკის, Ardshinbank-ის მფლობელმა კომპანია Arins Group-მა ხელი მოაწერა შეთანხმებას ქართული "ტერაბანკისა" და არაბთა გაერთიანებული საამიროების სამეფო ოჯახის მფლობელობაში არსებული ხუთვარსკვლავიანი სასტუმრო "ბილტმორ თბილისის" შეძენის შესახებ. ინფორმაციას OC media ავრცელებს.

Arins Group-ის ერთპიროვნული მფლობელი სომხური წარმოშობის ბიზნესმენი კარენ საფარიანია. ჯგუფმა "ბილტმორ თბილისის" შეძენის შეთანხმებას თავისი ერთ-ერთი შვილობილი კომპანიის, AGE SA-ს მეშვეობით მიაღწია.

"ტერაბანკის" შეძენის ტრანზაქცია ჯერ საბოლოოდ დასრულებული არ არის. მისი დახურვა საქართველოს ეროვნული ბანკის თანხმობაზეა დამოკიდებული, სადაც OC Media-ს განუცხადეს, რომ პროცესის დასრულებას, სულ მცირე, ორი თვე დასჭირდება.

ეროვნული ბანკის მონაცემებით, "ტერაბანკი" სიდიდით მეექვსე ბანკია საქართველოში.
Ardshinbank სომხეთის უმსხვილესი ბანკია, რომელიც ბაზრის 21%-ს ფლობს და პირველ ადგილზეა აქტივებით, დეპოზიტებით, კაპიტალით, საცალო დეპოზიტებით, წმინდა მოგებითა და ფილიალების ქსელით.

სასტუმრო "ბილტმორ თბილისი" Dhabi Group-ის მფლობელობაშია, რომელსაც საამიროების სამეფო ოჯახის რამდენიმე წევრი იყოფს. საქართველოს სამეწარმეო რეესტრის მიხედვით, ჰოლდინგში 66%-იან წილს შეიხი ნაჰაიან მაბარაკ ალ ნაჰაიანი ფლობს.

Ardshinbank-ის ვებგვერდზე განთავსებული ინფორმაციის თანახმად, 2000-იანი წლების დასაწყისისთვის საფარიანი "ათობით ბიზნესს ფლობდა რუსეთსა და სომხეთში". თუმცა, იქვე აღნიშნულია, რომ მან რუსული აქტივები 2019 წელს გაასხვისა და მას შემდეგ მისი ბიზნესსაქმიანობა "მხოლოდ სომხეთში, საფინანსო სექტორშია კონცენტრირებული". მის მნიშვნელოვან დეველოპერულ პროექტებს შორის დასახელებულია ერევანში მთავრობის სახლისა და მუნიციპალიტეტის შენობის მშენებლობა.