ისრაელის პრეზიდენტი ისააკ ჰერცოგი აცხადებს, რომ Flydubai-ის გუშინდელ FZ1073 რეისზე მყოფ ოთხ პირს სამოქალაქო გმირობისთვის პრეზიდენტის ჯილდოზე წარადგენს. მათ შორისაა ქართული წარმოშობის ისრაელელი ექიმი შოთა მუსაევი, რომელმაც მძიმედ დაშავებულ კაპიტან სმიტ მაჩჰარს სიცოცხლის შემანარჩუნებელი სამედიცინო დახმარება გაუწია.

როგორც ისრაელის მედია წერს, ჯილდოზე წარდგენილთა შორის არიან იანივ ჰაიუნი, ცვიკა მანესი და ასაფ რაჯუანი, რომლებიც კაბინაში შევიდნენ და მეორე პილოტი გაანეიტრალეს მას შემდეგ, რაც მან კაპიტან სმიტ მაჩჰარს დანა დაარტყა.

ჰერცოგის თქმით, ჰაიუნი, მანესი და რაჯუანი "დახმარების გასაწევად მაშინვე გაემართნენ, კაბინაში შევიდნენ და თავდამსხმელი გაანეიტრალეს, რითაც საკუთარ სიცოცხლეს სერიოზული საფრთხე შეუქმნეს, ხოლო ჰაიუნი თვითმფრინავის მართვის საშუალებებს აკონტროლებდა".

"მას შემდეგ, რაც თავდამსხმელი გაანეიტრალეს, ექიმმა მუსაევმა მძიმედ დაშავებულ პილოტს სიცოცხლის შემანარჩუნებელი სამედიცინო დახმარება გაუწია და მისი მდგომარეობის სტაბილიზაციაში დაეხმარა, ვიდრე თვითმფრინავი საუდის არაბეთში ავარიულ დაშვებას განახორციელებდა", — ამბობს ჰერცოგი.

მისი თქმით, "მგზავრებისა და ეკიპაჟის სწრაფმა მოქმედებამ დიდი კატასტროფა თავიდან აიცილა".

ჰერცოგი ამბობს, რომ ოთხ კაცს ესაუბრა და "დიიდ მადლობა გადაუხადა იმ გამჭრიახობისთვის, სიმამაცისა და ერთმანეთზე პასუხისმგებლობისთვის, რომელიც მათ უკიდურესი საფრთხის მომენტში გამოავლინეს".

სამოქალაქო გმირობისთვის პრეზიდენტის ჯილდო შედარებით ახალი ჯილდოა. ჰერცოგმა ის 2023 წლის 7 ოქტომბერს "ჰამასის" ხელმძღვანელობით განხორციელებული თავდასხმის შემდეგ დააარსა. ეს არის ისრაელის უმაღლესი სამოქალაქო ჯილდო გმირობისთვის.

შეგახსენებთ, რომ გუშინ, 30 სექტემბერს, დუბაი-თელ-ავივის Flydubai-ის FZ1073 რეისზე ერთ-ერთმა პილოტმა კაპიტანს დანით მიაყენა ჭრილობები, რის შემდეგაც თვითმფრინავმა სწრაფად დაკარგა სიმაღლე და რამდენიმე წუთის განმავლობაში მისი მართვა საფრთხის ქვეშ აღმოჩნდა. დაჭრილმა კაპიტანმა კაბინის კარი გახსნა, რის შემდეგაც რამდენიმე მგზავრი და ეკიპაჟის წევრი კაბინაში შევიდა და თავდამსხმელი გაანეიტრალა. ბორტზე მყოფმა ექიმმა, შოთა მუსაევმა, მძიმედ დაჭრილ კაპიტანს პირველადი სამედიცინო დახმარება გაუწია. თვითმფრინავმა საბოლოოდ საგანგებო დაშვება საუდის არაბეთში, ტაბუკის აეროპორტში განახორციელა და ბორტზე მყოფი 174 ადამიანი უსაფრთხოდ გადმოვიდა.