სამართალდამცავ სტრუქტურებს შორის კოორდინაციის საკითხებში სახელმწიფო მინისტრის, მამუკა მდინარაძის ბრიფინგიდან ცნობილი გახდა, რომ შინაგან საქმეთა სამინისტროში შეიქმნება სამმართველო, რომელიც საჯარო სივრცეში სიძულვილის ენას, შეურაცხმყოფელ კამპანიებსა და აგრესიულ კომუნიკაციას მონიტორინგს გაუწევს და შესაბამის სამართლებრივ რეაგირებას იქონიებს. ეს შეეხება ნებისმიერი ტიპის საჯარო კომუნიკაციას.

მისი განცხადებით, ირაკლი კობახიძის ინიციატივით დებატების სივრცის გახსნა პირველი მნიშვნელოვანი ნაბიჯი იყო, ხოლო ახლა მორიგ მნიშვნელოვანი ეტაპი იქნება, რომელიც შსს-ში ახალი სამმართველოს შექმნას გულისხმობს.

"შსს-ში შეიქმნება სამმართველო, რომლის ფუნქციაც საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და შესაბამისი სამართლებრივი რეაგირება იქნება. იგულისხმება ნებისმიერი ტიპის საჯარო კომუნიკაცია, რომელიც შეიცავს სიძულვილის ენას, შუღლის გაღვივებას, ღირსების შელახვას და სხვა.

პრინციპულად მნიშვნელოვანია, რომ აღნიშნული სამმართველო იმოქმედებს პროაქტიურ რეჟიმში და რეაგირება არ იქნება დამოკიდებული მხოლოდ მოქალაქის საჩივარზე. უწყება თავად განახორციელებს მონიტორინგს, შესაბამის სამართლებრივ შეფასებას და საჭიროების შემთხვევაში თავად გადააგზავნის მასალებს სასამართლოში.

იმისთვის, რომ არ დარჩეს სივრცე სპეკულაციებისთვის, ხაზგასმით აღვნიშნავ, რომ ამ გადაწყვეტილების მიზანი არ არის აზრის და გამოხატვის თავისუფლების რამე ფორმით შეზღუდვა. დემოკრატიული სახელმწიფოს საფუძველი სწორედ თავისუფალი დისკუსია და აზრთა მრავალფეროვნებაა, თუმცა ეს თავის მხრივ არ უნდა გახდეს ძალადობრივი, შეურაცხმყოფელი და საზოგადოებრივი დაპირისპირების წამახალისებელი კომუნიკაციის საფუძველი. დემოკრატიული სახელმწიფოსთვის აუცილებელია აზრთა სხვადასხვაობა და კრიტიკული დისკუსია, პარალელურად არსებობს მინიმალური სტანდარტები, რომელზეც საზოგადოება უნდა თანხმდებოდეს, მათ შორის, ერთმანეთის მიმართ პატივისცემა და იმ ტიპის კომუნიკაციის მიუღებლობა, რომელიც მტრობას, შუღლს, საზოგადოებრივ დაძაბულობას და უკიდურეს პოლარიზაციას აღვივებს.

მოგეხსენებათ, ამ მიმართულებით უკვე გვაქვს პარლამენტის მიერ მიღებული შესაბამისი საკანონმდებლო ბაზა, თუმცა მხოლოდ კანონმდებლობა საკმარისი არაა, მის ეფექტურ აღსრულებას ფუნდამენტური მნიშვნელობა აქვს. სწორედ ამიტომ, მიმდინარე გამოწვევების კვალდაკვალ ვაძლიერებთ შსს-ს ინსტიტუციურ შესაძლებლობებს და ახალი სამმართველო უზრუნველყოფს მუდმივ მონიტორინგს და კანონით გათვალისწინებული მექანიზმების ეფექტიან გამოყენებას.

სახელმწიფო ვალდებულია დაიცვას საზოგადოებრივი სივრცე დესტრუქციული და ხელოვნურად გაღრმავებული პოლარიზაციისგან, შესაბამისად, საქართველოს სამართალდამცავი სისტემა უზრუნველყოფს ისეთი სტანდარტებისა და წესების, დამკვიდრებას, რომელიც გააძლიერებს საზოგადოებრივ სტაბილურობას ურთიერთპატივისცემას და პასუხისმგებლიან საჯარო კომუნიკაციას," — განაცხადა მამუკა მდინარაძემ.

სამართალდამცავ სტრუქტურებს შორის კოორდინაციის საკითხებში სახელმწიფო მინისტრს დღეს გამართულ ბრიფინგზე ჰკითხეს — როგორ უნდა დაარწმუნონ კრიტიკულად განწყობილი ადამიანები, რომ ახალი სამმართველოს შექმნა არ არის სიტყვის და გამოხატვის თავისუფლების შეზღუდვა და ვინ უნდა განსაზღვროს რა არის სიძულვილის ენა? მდინარაძის თქმით, "კრიტიკის გამო არავინ არავის დაადებს ადმინისტრაციულ სახდელს". რაც შეეხება "სიძულვილის ენის განსაზღვრას", მისი თქმით, კრიტიკული შემფასებელი სასამართლო იქნება და შესაძლოა, გამოყენებულ იქნეს ადმინისტრაციული პატიმრობაც.

"პირველი შემფასებელი იქნება შსს-ს შესაბამისი სამმართველო, მაგრამ საბოლოო კრიტიკული შემფასებელი იქნება სასამართლო, ისევე როგორც ჩემს მიერ ჩამოთვლილ ქვეყნებში ხდება. ბრიტანეთში საჯარო პოსტი ითვლება შეურაცხყოფად თუ ის შეურაცხყოფის ელემენტებს შეიცავს და არა კრიტიკას. კრიტიკის გამო არავინ არავის დაადებს ადმინისტრაციულ სახდელს, ამის გარანტიას გაძლევთ. მაგრამ თუ საყოველთაოდ მთელ მსოფლიოში გავრცელებული მოსაზრებით, არა მხოლოდ საქართველოში, საყოველთაოდ, მთელ მსოფლიოში პრეცედენტულად გავრცელებული მოსაზრებით, ითვლება კონკრეტული ფრაზა, წინადადება შეურაცხყოფად, შუღლის გამაღვივებელ წინადადებად თუ ფრაზად, ამ შემთხვევაში, დიახ, მათ შორის, შეიძლება ადმინისტრაციული პატიმრობა გამოიყენოს სასამართლომ იმ ადამიანის მიმართ, რომელიც ასეთ შუღლის გამაღვივებელ მიმართვას გამოიყენებს კონკრეტული ადამიანის თუ პირთა ჯგუფის მიმართ და ეს პრეცედენტები უკვე გვაქვს. საბედნიეროდ, ჩვენი დიდი პლუსი აი, აქ არის ის, რომ ჩვენ არ გვჭირდება, რომ გამოვიგონოთ ახალი მიდგომა," — აღნიშნა მდინარაძემ.