ბერა ივანიშვილის ადვოკატის, დავით ასათიანის თქმით, ქართული ოცნების საპატიო თავმჯდომარის, ბიძინა ივანიშვილის ვაჟმა, ბერა ივანიშვილმა, მის წინააღმდეგ ბოლო პერიოდში გავრცელებული ცილისმწამებლური განცხადებების სამართლებრივად გასაჩივრება გადაწყვიტა. მისივე თქმით, სარჩელის ადრესატები იქნებიან რამდენიმე მედიასაშუალება და კონკრეტული პირები, რომლებიც ბერას კრიმინალურ საქმიანობას უკავშირებენ. ამის შესახებ დავით ასათიანმა სამთავრობო ტელეკომპანია "იმედის" ეთერში განაცხადა.

"ჩვენი სარჩელის ადრესატები იქნებიან რამდენიმე მედიასაშუალება, კონკრეტული პირები, ადამიანები, რომლებიც ავრცელებენ ამ ცილისწამებას და მტკიცებით ფორმაში ფაქტებს, რომლებსაც რეალურად არანაირი საფუძველი არ გააჩნია და არის ყალბი და მტკნარი სიცრუე.

ამ ეტაპზე ჩვენ მომზადების ეტაპზე გვაქვს სამართლებრივი დოკუმენტები, მონიტორინგს ვუკეთებთ ყველა განცხადებას, რომელიც მასთან დაკავშირებით არის ცილისმწამებლური და ბოლო პერიოდში გაკეთებულია მედიასაშუალებებში თუ სხვადასხვა პირის მხრიდან. როდესაც დავასრულებთ აღნიშნულს, ჩვენ აუცილებლად წარვდგებით სასამართლოს წინაშე და დარწმუნებული ვარ, ბერა დაამტკიცებს, რომ ყოველივე ეს — მისი დაკავშირება გარკვეულ კრიმინალურ საქმიანობასთან, პირდაპირ რომ ვთქვათ, ადამიანისთვის დანაშაულის დაბრალება, არის სიცრუე, სიყალბე და ცილისწამება", — განაცხადა ბერა ივანიშვილის ადვოკატმა.

შეგახსენებთ, რომ 31 სექტემბერს ბერა ივანიშვილმა განაცხადა, რომ მის წინააღმდეგ "სიცრუისა და სიბინძურის ნიაღვრის" უპასუხოდ დატოვებამ ამ პროცესის ორგანიზატორები წაახალისა და ამიტომ გადაწყვიტა, შესაბამის ზომებს მიმართოს. მისი თქმით, სურს, მის წინააღმდეგ გავრცელებულ ცილისმწამებლურ განცხადებებს სამართლებრივი შეფასება მიეცეს და, ცილისწამების ფაქტის დადგენის შემთხვევაში, პასუხისმგებელმა პირებმა კანონის შესაბამისად აგონ პასუხი.