ქართული ოცნების წევრი ირაკლი ზარქუა გორში, პოლიციელების მიერ 2 პირზე ძალადობას გამოეხმაურა. მისი განმარტებით მსგავსი შემთხვევები საქართველოს ფარგლებს გარეთაც ხდება და მთავარი ისაა, რომ სახელმწიფოს რეაგირება აქვს. მისივე თქმით, მსგავსი ქცევის წახალისება არ მომხდარა.

"ასეთი გადამეტებები მთელ მსოფლიოში ხდება. ეს არ არის მხოლოდ საქართველოს მაგალითი. მთავარი რა არის, რომ, არის მყისიერი რეაგირება. ჩვენ ვნახეთ ამ დღეებში ევროპის სხვადასხვა ქვეყნებში გადამეტებული ძალადობა პოლიციის მხრიდან მოქალაქეებს, მაგრამ იქ არც საქმე აღძრულა და არც დაუკავებიათ. აქ მნიშვნელოვანია, რომ საქართველოს ხელისუფლება როგორც კი ნახავს მსგავს გადაზედმეტებულ მოქმედებას ძალოვნების მხრიდან, იქ რეაგირებაა მყისიერი... არანაირი წახალისება არ არის და არც ყოფილა. ის, ვინც დასაჯილდოებელია — დავაჯილდოებთ მომავალშიც. პოლიციელი გმირია და ემსახურება მართლწესრიგს, მაგრამ არის გადაცდომები, სადაც მთავარი არის კანონი. სახელმწიფო რეაგირებს ასეთ თემატიკებს", — განაცხადა ირაკლი ზარქუამ (კომენტარს "ფორმულა" ავრცელებს).

პაპუნა ლოცულაშვილი თავდაპირველად სისხლის სამართლის კოდექსის 353-ე მუხლით იყო დაკავებული, რაც პოლიციის თანამშრომლისთვის წინააღმდეგობის გაწევას გულისხმობს ძალადობის მუქარით, მისი სამსახურებრივი საქმიანობის შეწყვეტის მიზნით.

შეგახსენებთ, გუშინ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე.აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო.