მომავალ კვირას გაფართოებული საეკლესიო კრება გაიმართება, რომლის მთავარი მიზანი ახალი კათოლიკოს-პატრიარქის არჩევა იქნება. ამის შესახებ საპატრიარქო ტახტის მოსაყდრემ, მეუფე შიომ გიორგობის დღესასწაულზე, საზეიმო წირვის დასრულების შემდეგ.

მან ხაზი გაუსვა ამ მოვლენის ისტორიულ მნიშვნელობას და მრევლს ლოცვის გაძლიერებისკენ მოუწოდა, რათა პროცესი მშვიდობიან და ღირსეულ გარემოში წარიმართოს.

"თქვენ იცით, რომ მომდევნო კვირაში ჩვენ მოგვიწევს დიდი გაფართოებული საეკლესიო კრების ჩატარება, სადაც უნდა მოხდეს ახალი კათოლიკოს-პატრიარქის გამორჩევა. მე მინდა ვთხოვო ჩვენს სამღვდელოებას, ჩვენს საეკლესიო დასს, ყოველ თქვენგანს, ჩვენს ძვირფას მრევლს, რომ გააძლიერონ ლოცვები, რათა ეს დიდი მოვლენა ჩავატაროთ ღირსეულად, მშვიდობიანად, სიყვარულით, რომ ღვთის ნება აღსრულდეს და ყოფილიყოს ჩვენი ეკლესიისა და ერისთვის სასარგებლო არჩევანი და გადაწყვეტილება. წმინდა გიორგის ვევედროთ, პირველ რიგში. წმინდა გიორგი შეგვეწიოს ყველას, მისი უწმინდესობისა და უნეტარესობის სულს და დალოცოს ყოველი ჩვენგანი", — განაცხადა მეუფე შიომ.

შეგახსენებთ, 28 აპრილის სინოდის სხდომაზე, მღვდელმთავრებმა პატრიარქობის სამი კანდიდატი გამოარჩიეს.

სინოდის სხდომის ოქმის მიხედვით, კენჭისყრის შედეგად ხმები შემდეგნაირად გადანაწილდა:
საპატრიარქო ტახტის მოსაყდრე, სენაკისა და ჩხოროწყუს მიტროპოლიტმა შიო. 20 ხმა მიიღო; მროველ-ურბნელმა მიტროპოლიტმა იობმა – 7 ხმა; ფოთისა და ხობის მიტროპოლიტმა გრიგოლმა — 7 ხმა; მარგვეთისა და უბისის ეპისკოპოსმა მელქისედეკმა – 0 ხმა; ბელგიისა და ჰოლანდიის ეპისკოპოსმა დოსითემ — 1 ხმა; წალკელმა ეპისკოპოსმა გრიგოლმა – 2 ხმა.
მისივე ცნობით, ერთ ბიულეტენზე არცერთი კანდიდატის სახელი არ დაფიქსირდა, ამიტომ ის ბათილად იქნა მიჩნეული.