"ამ საკითხის მხოლოდ დიპლომზე დაყვანა წარმოუდგენელია. თუ მშრალად გავყვებოდით, ცოტა უხერხულ მდგომარეობაში აღმოვჩნდებოდით, რადგან შეიძლება მხოლოდ მეუფე ისაია არა, აღმოჩნდნენ არა ერთი და ორი [დიპლომის გარეშე]" — ამის შესახებ ფოთისა და ხობის მიტროპოლიტმა, პატრიარქობის 3 კანდიდატიდან ერთ-ერთმა, მეუფე გრიგოლმა განაცხადა. მისი თქმით, "მეუფე ისაია არის კერძო შემთხვევა და ამას განხილვა სჭირდებოდა როგორც კერძო შემთხვევას". მის კომენტარს IPN ავრცელებს.

"ამ საკითხის მხოლოდ დიპლომზე დაყვანა წარმოუდგენელია. თუ მშრალად გავყვებოდით, ცოტა უხერხულ მდგომარეობაში აღმოვჩნდებოდით, რადგან შეიძლება მხოლოდ მეუფე ისაია არა, აღმოჩნდნენ არა ერთი და ორი. ჩვენ ყველა მღვდელმთავრები ვართ — დიპლომიანიც და უდიპლომოც. რას ნიშნავს ეს? თუ მაინც ამ ფორმალობასაც მივაქცევდით ყურადღებას, მეუფე ისაია არის კერძო შემთხვევა და ამას განხილვა სჭირდებოდა როგორც კერძო შემთხვევას.

ადამიანები თავისუფალი არიან თავის არჩევანში. თავის გულში, ვის რა უნდა ერთია, მაგრამ არჩევანს მღვდელმთავრები აკეთებენ და ბუნებრივია, როგორც ისინი გადაწყვეტენ, ისე იქნება. შემდეგ ეს უნდა დაამტკიცოს სულიწმიდამ კურთხევის ჟამს. ეს იქნება ამ ისტორიული მოვლენის კულმინაციური მომენტი. საპატრიარქო არჩევნები განსაკუთრებით საქართველოსთვის არის ზოგადეროვნული მნიშვნელობის მოვლენა გამომდინარე იქიდან თუ რა როლი აქვს ჩვენი ერის ისტორიაში. "მამული, ენა, სარწმუნოება" — მისმა უწმინდესობამ ეს თავისებურად გამოთქვა: "ღმერთი, სამშობლო, ადამიანი", — განაცხადა ფოთისა და ხობის მიტროპოლიტმა, მეუფე გრიგოლმა.

ცნობისთვის, საპატრიარქოში სინოდის სხდომა, რომელზეც პატრიარქობის 3 კანდიდატი უნდა შეერჩიათ, დასრულდა. საპატრიარქოს საზოგადოებასთან ურთიერთობის სამსახურის ხელმძღვანელმა დეკანოზმა, ანდრია ჯაღმაიძემ ჟურნალისტებთან საუბრისას განაცხადა, რომ სინოდის წევრებმა კანდიდატებად მოსაყდრე შიო (მუჯირი), მეუფე იობი (აქიაშვილი) და მეუფე გრიგოლი (ბერბიჭაშვილი) აირჩიეს. მისი განმარტებით, ხმათა უმრავლესობა (20 ხმა) მოსაყდრე შიომ, ხოლო დანარჩენმა ორმა კანდიდატმა 7-7 ხმა მიიღეს.

შეგახსენებთ, რომ ეკლესიის მართვა-გამგეობის დებულების თანახმად, პატრიარქის გარდაცვალების ან გადადგომის შემთხვევაში, ახალი წინამძღოლის არჩევა შეზღუდულ ვადებში, პატრიარქის გარდაცვალებიდან 40 დღის შემდეგ, არაუგვიანეს 2 თვეში უნდა განხორციელდეს.