საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე სოციალურ ქსელში სრულიად საქართველოს კათოლიკოს-პატრიარქის, ილია II-ის კარნახით დაწერილ წერილს აქვეყნებს. ტექსტი 2017 წლის 24 ნოემბრით, საპატრიარქო ტახტის მოსაყდრედ მიტროპოლიტ შიოს (მუჯირი) დასახელების მეორე დღით, თარიღდება.

ჩანაწერში უწმინდესი წერს, რომ "როდესაც დაფარულია [ანდერძი], ეს ქმნის გარკვეულ დაძაბულობას და მითქმა-მოთქმას". ეს რომ არ მოხდეს, არჩია დაესახელებინა ვინ იყო ჩაწერილი ანდერძში, "ახლა დაწყნარდნენ, ყველამ იციან ვინ არის მოსაყდრე". მისივე თქმით, "მოსაყდრეც ფრთხილად უნდა იყოს, არ უნდა წარმოიდგინოს, რომ თვითონაა პატრიარქი".

პატრიარქის განმარტებით, ტრადიციულად, პატრიარქი ანდერძს მოსაყდრის შესახებ თანამდებობაზე დადგომისთანავე წერს, თუმცა მისი გასაიდუმლოება ხშირად დაძაბულობის საფუძველი ხდება. ილია II იხსენებს საკუთარ გამოცდილებასაც, როდესაც პატრიარქ დავითის დროს ანდერძის გაუჩინარებამ "ნერვიული სიტუაცია" შექმნა და საჭირო გახდა სინოდის მიერ მისი კანდიდატურის დასახელება.

"ურთულესი დრო, პრიორიტეტები იცვლება.

მეცნიერება მიდის წინ, გარემოებები ადამიანი მუდამ უნდა მიუძღოდეს წინ, მან უნდა გაუკვალოს. რეალობაში სხვა ძალები, ბოროტი ძალები უსწრებენ, ამიტომ ამიტომ ცხოვრება აყენებს ახალ პრობლემებს, რასაც სჭირდება პასუხი. ეკლესიაშიც ახალი პრობლემებია, რთულდება ურთიერთობები ადამიანებს შორის. წამოიჭრა ახალი საკითხები, რომლებიც აქამდე არ ყოფილა, როცა ბუნებრივად ვითარდება გასაგებია სულიერიც ხელოვნურად ხდება, ამით ცოდვას მოემატა ბოროტება. ცოდვას და ბოროტებას ვაკნინებთ. რატომ ვაკნინებთ? იმისთვის, რომ თითქოს პასუხი არ გავიგოთ, თუმცა ღვთის წინაშე მაინც ვიგებთ პასუხს. მნიშვნელობა არა აქვს კანონებს.

პატრიარქი როდესაც დგება თანამდებობაზე მაშინვე სწერს ანდერძს მოსაყდრის შესახებ. ეს მერე იცვლება კიდეც. როდესაც დაფარულია ქმნის გარკვეულ დაძაბულობას და მითქმა-მოთქმას. არის შემთხვევები, როცა იკარგება ანდერძი. მაგალითად ჩემს შემთხვევაში პატრიარქმა დავითმა რამდენჯერმე მითხრა რომ შენზეა დაწერილი ანდერძი, თუ გინდა გაჩვენებო. არა მეთქი არ მინდა. შემდეგ დაიკარგა. დავითი ტყუილს რატომ მეტყოდა.

ამან შექმნა ნერვიული სიტუაცია და საჭირო გახდა სინოდს დავესახელებინე. ასეთი რამ წინათაც მომხდარა. ეს რომ არ მოხდეს, ვარჩიე დამესახელებინა ვინ იყო ჩაწერილი ანდერძში, რომ შეწყდეს გასაღები ვისა აქვს და სარტყელზე ვისა აქვს შებმულიო. ახლა დაწყნარდნენ, ყველამ იციან ვინ არის მოსაყდრე. მოსაყდრეც ფრთხილად უნდა იყოს, არ უნდა წარმოიდგინოს, რომ თვითონაა პატრიარქი. მოსაყდრე დიდი დახმარებაა თუ სათანადოდ გაუძღვა. პატრიარქის და სინოდის დამხმარე. პირველი ეპისკოპოსი პატრიარქის შემდეგ პირველი კანდიდატია პატრიარქობის ტახტზე.

პიმენი რომ გარდაიცვალა, იქაც ცნობილია მოსაყდრე, იქ კიევის მიტროპოლიტია მექანიკურად. პირველივე კენჭისყრით უარყოფილ იქნა მოსაყდრე ფილარეტი. რამდენიმე ეპისკოპოსმა უნდა წარმოადგინოს კანდიდატი.

ურთიერთობა ხალხთან, მღვდელმთავრებთან, რომ გაძლიერდეს ლოცვა", — წერია გამოქვეყნებულ ხელნაწერში.

მანამდე დეკანოზმა ანდრია ჯაღმაიძემ სოციალურ ქსელში გაავრცელა 2017 წლის პირველი ნოემბრით დათარიღებული 19-წუთიანი ვიდეო, რომელიც პატრიარქთან მიტროპოლიტ ილარიონ ალფეევის ვიზიტს სრულად ასახავს. დეკანოზმა ასევე დაწერა, რომ უნდა დასრულდეს 9-წლიანი სპეკულაციები და ტყუილები, თითქოს მოსაყდრის გამორჩევა რაიმე კავშირში იყოს ამ დღესთან.

"შეხვედრის ამსახველი ვიდო. სრული ჩანაწერი, მისალმებიდან დამშვიდობებამდე.
უნდა დასრულდეს 9 წლიანი სპეკულაციები და ტყუილები, თითქოს საქართველოს კათოლიკოს-პატრიარქს ერთი ერთზე შეხვედრა ჰქონდა სტუმართან ამ ვიზიტის დროს და თითქოს მოსაყდრის გამორჩევა რაიმე კავშირში იყოს ამ დღესთან", — დაწერა ანდრია ჯაღმაიძემ.

ვიდეოს მიხედვით, მიტროპოლიტი ილარიონ ალფეევი ილია მეორეს პატრიარქ კირილისგან გულითად მოკითხვას გადასცემს და მოსკოვში ეპატიჟება. შემდეგ კი საჩუქრად გადასცემს ბუკინისტებში მოპოვებულ იშვიათ გამოცემებს — 1910 წლით დათარიღებულ ეპისკოპოსისა და მომავალი პატრიარქის, კირიონის წიგნს "ივერიის კულტურის როლი რუსეთის ისტორიაში", 1905 წლით დათარიღებულ მომავალი პატრიარქის კალისტრატეს წიგნს "ქართული ეკლესიის ავტოკეფალია" (ისტორიული ნარკვევი) ავტორის ავტოგრაფით და ანტონ კათალიკოსის პორტრეტს. ილია მეორე კი მას თრიალეთის ოქროს თასის ასლს ჩუქნის.

მანამდე, საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ტელეკომპანია "იმედის" ეთერში რუსეთის ეკლესიის საგარეო საქმეთა განყოფილების ყოფილი ხელმძღვანელის, ილარიონ ალფეევის 2017 წლის ვიზიტის კადრები წარადგინა. დეკანოზმა განმარტა, რომ ჩანაწერის გასაჯაროების მიზანი იმ ეჭვების გაქარწყლებაა, რომლებიც ალფეევის ვიზიტსა და რამდენიმე კვირაში (23 ნოემბერს) მეუფე შიოს მოსაყდრედ დასახელებას შორის კავშირს ეხება.

"ვთხოვდი უბრალოდ იმ ხალხს, ვინც დიდი ხანია სპეკულაციას ეწევა ამ თემაზე, რომ ახლა მაინც იქნებ დადუმდნენ ამ თემაზე, თითქოს ალფეევის ჩამოსვლას რამე უკავშირდება", — თქვა დეკანოზმა.

მან ასევე დასძინა, რომ ეკლესიას აქვს "სიმყარის დიდი რესურსი" და მუდმივად თავის მართლება არ სჭირდება, თუმცა შექმნილი ვითარების გამო ფირის გასაჯაროება აუცილებელი გახდა.

შეგახსენებთ, 28 აპრილის სინოდის სხდომაზე, მღვდელმთავრებმა პატრიარქობის სამი კანდიდატი გამოარჩიეს.

სინოდის სხდომის ოქმის მიხედვით, კენჭისყრის შედეგად ხმები შემდეგნაირად გადანაწილდა:
საპატრიარქო ტახტის მოსაყდრე, სენაკისა და ჩხოროწყუს მიტროპოლიტმა შიო. 20 ხმა მიიღო; მროველ-ურბნელმა მიტროპოლიტმა იობმა – 7 ხმა; ფოთისა და ხობის მიტროპოლიტმა გრიგოლმა — 7 ხმა; მარგვეთისა და უბისის ეპისკოპოსმა მელქისედეკმა – 0 ხმა; ბელგიისა და ჰოლანდიის ეპისკოპოსმა დოსითემ — 1 ხმა; წალკელმა ეპისკოპოსმა გრიგოლმა – 2 ხმა.
მისივე ცნობით, ერთ ბიულეტენზე არცერთი კანდიდატის სახელი არ დაფიქსირდა, ამიტომ ის ბათილად იქნა მიჩნეული.